Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 847 Hüküm no: 1430 Orijinal metin no: [119a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Ali’nin alacağı olduğu Ma‘rûz Mahmiye-i İslâmbol’da Hoca Paşa mahallesinde sâkin sâhib-i arzuhâl Bostanî Ali b. Osman medîne-i Üsküdar’da mahfil-i Bâb’da meclis-i şer‘-i hatîrde derûn-ı arzuhâlde mezkûrü’l-ism Memiş b. Mehmed mahzarında mezbûr Memiş târih-i i‘lâmdan iki sene mukaddem ordu-yı hümâyûnda bir menzil nizâmı emrini Eğriboz mâlından buzcubaşıdan üç bin guruş almak üzere havâle etdirmek için yedine bi-tarîki’r-rüşve üç yüz otuz dört guruş teslîm edip meblağ-ı merkūm buzcubaşıdan havâle olmamağla medfû‘um olan meblağ-ı merkūm üç yüz otuz dört guruşu istirdâd ederim deyü da‘vâ mezbûr Memiş cevâbında meblağ-ı merkūm üç yüz otuz dört guruşu müdde‘î-i mezbûrdan husûs-ı merkūm için ahzını ikrâr lâkin gāib ani’l-meclis İbrahim Efendi nâm kimesnenin mektûbuyla alıp mezbûr İbrahim Efendi’nin havâle eylediği mahalle teslîm eyledim deyü eylediği def‘ine iltifât olunmayıp ikrârı mûcebince meblağ-ı merkūm üç yüz otuz dört guruşu müdde‘î-i mezbûra edâ ve teslîme tenbîh olunduğu mübâşiri el-Hâc Ahmed Çavuş iltimâsıyla huzûr-ı âlîlerine i‘lâm olundu. Fî 22 min-M sene 1207.