Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 848 Hüküm no: 1431 Orijinal metin no: [119a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin’in alacağı olduğu iddiasıyla açtığı davada iddiasını ispat edemediği Ma‘rûz Medîne-i Üsküdar’da Toygar Hamza mahallesinde sâkin es-Seyyid Hüseyin b. Ali mahfil-i Bâb’da meclis-i şer‘-i hatîrde Hasan Efendi b. el-Hâc Mustafa mahzarında târih-i i‘lâmdan beş sene mukaddem mezbûr Hasan Efendi’ye beher şehr onar guruş ücret kavliyle üç ay ordu-yı hümâyûnda hizmet etmemle şühûr-ı mezkûrda müctemi‘a olan otuz guruşu taleb ederim deyü da‘vâ ve mezbûr Hasan Efendi cevâbında müdde‘î-i mezbûr ber-vech-i muharrer onar guruş ücret kavliyle iki buçuk ay hizmetini ikrâr lâkin ordu-yı hümâyûna gider iken ale’l-hesâb ücretine mahsûben otuz guruş def‘ ve teslîm eylediğimden mâ‘adâ mecmû‘-ı kıymetleri altmış guruşa bâliğ bir çuka şalvar ve bir yağmurluk ve heğbe ve kılıç ve piştov i‘âre etmişdim deyü da‘vâ ve müdde‘î-i mezbûr meblağ-ı merkūm otuz guruşu bana hibe etmişdi deyü eylediği def‘ini beyâna kādir olamayıp talebiyle mezbûr Hasan Efendi gıbbe’t-tahlîfi’ş-şer‘î mûcibiyle müdde‘î-i mezbûr otuz guruş mütâlebesiyle mezbûr Hasan Efendi’ye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 20 min-M sene 1207.