Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 848 Hüküm no: 1432 Orijinal metin no: [119a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Mehmed Sadık Efendi’nin merhume karısının alacağı olduğu Ma‘rûz Medîne-i Üsküdar’da Arakıyeci el-Hâc Cafer mahallesi sükkânından müderrisîn-i kirâmdan Mehmed Sadık Efendi b. Mehmed Efendi taraflarından ber-vech-i âtî vekîlleri olduğu Ahmed b. Mustafa ve Süleyman b. İsmail nâm kimesneler şehâdetleriyle sâbit olan Ali Efendi b. Hasan nâm kimesne medîne-i mezbûrede mahfil-i Bâb’da meclis-i şer‘-i hatîrde Yakut bt. Norsis nâm Nasrâniye muvâcehesinde merkūme Yakut Nasrâniye târih-i i‘lâmdan bir sene mukaddem müvekkilim mûmâ-ileyhin halîleleri Şerife Âişe Hanım bt. es-Seyyid Yahya Efendi’ye üç yüz guruş deyni mukābilesinde medîne-i mezbûrede vâki‘ ma‘lûmü’l-hudûd bir bâb vakıf menzilin bâ-ma‘rifet-i mütevellî vefâen ferâğ ve teslîm ve meblağ-ı merkūmu kable’l-edâ mezbûre Âişe Hanım vefât edip verâseti müvekkilim mûmâ-ileyh ile ammisinin kerîmesi diğer Şerife Âişe Hanım’a mevrûs oldukdan sonra menzil-i mezkûru rehniyetden ba‘de’l-fekk meblağ-ı merkūmdan müvekkilim mûmâ-ileyhin hissesine isâbet eden yüz elli guruşun yüz yirmi dokuz guruşun bi’d-defa‘ât yedinden ahz ve bâkī yirmi bir guruşu zimmetinde kalmağla bi’l-vekâle taleb ederim deyü da‘vâ ol dahi cevâbında ber-vech-i muharrer ol-mikdâr meblağ deyni olduğunu ikrâr lâkin vekîl-i mezbûrun kabzını mu‘terif olduğu meblağ-ı merkūm yüz yirmi dokuz guruşdan mâ‘adâ yirmi bir guruş dahi kendiye edâ ve teslîm edip ol-vechile zimmetim berî’e olmuşdu deyü ba‘de’d-def‘ ve’l-inkâr dâfi‘a-i merkūme ber-minvâl-i muharrer def‘ini beyân için ba‘de’l-istimhâl ve’l-imhâl müddet-i mehl-i şer‘î tamam ve birkaç gün dahi mürûr edip bir vechile def‘ini isbâta kādir olmamağla müvekkil-i mûmâ-ileyh mevkūfen ale’l-yemîn mukırre olduğu meblağ-ı bâkī-i merkūm yirmi bir guruşu vekîl-i mezbûr Ali Efendi’ye edâ ve teslîme merkūme Yakut Nasrâniyeye şer‘an tenbîh olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 21 min-Z sene 1206.