Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 850 Hüküm no: 1434 Orijinal metin no: [119b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büyük İskele at kayıkçılarının kendilerine kayıkhanelerini kiraya vermek istemeyen kayıkhane sahiblerinden Mustafa Efendi ile Seyyid Mehmed Ataullah Efendi hakkında davacı oldukları Ma‘rûz Medîne-i Üsküdar’da Büyük İskele at kayıkçılarından ashâb-ı arzuhâl Mehmed b. Ahmed ve Ahmed b. Ali ve Mustafa b. Mustafa ve es-Seyyid Hasan b. İsmail ve Ali b. Osman ve es-Seyyid Mehmed b. Mustafa ve diğer Mustafa b. Mehmed ve Abdullah b. Ali ve Ahmed b. İbrahim ve es-Seyyid Osman b. Ömer ve Ali b. İsmail ve diğer Mustafa b. Mehmed nâm kimesneler medîne-i mezbûrede mahfil-i Bâb’da meclis-i şer‘-i hatîrde iskele-i mezbûrede kayıkhâne sâhiblerinden Mustafa Efendi b. el-Hâc Mehmed ve es-Seyyid Mehmed Ataullah Efendi b. es-Seyyid Mehmed mahzarında mezbûrân Mustafa Efendi ve es-Seyyid Mehmed Ataullah Efendi’nin iskele-i mezbûrede kâin iki bâb kayıkhâneleri ez-kadîm mavna kayıkhânesi olup bu esnâda piyâde kayıkhânesi irâdesiyle piyâdecilere îcâr murâd ve kadîmî üzere bize îcârdan imtinâ‘ etmeleriyle kemâ-fi’l-evvel îcâr olunmasını da‘vâ ve mezbûrân cevâblarında mezbûr Mustafa Efendi’nin kayıkhânesi kadîmden at kayığı çekilir kayıkhâne olup ve mezbûr Mehmed Ataullah Efendi’nin kayıkhânesine bir aded ateş kayığı çekilip mâ‘adâsına piyâde çekilegeldiğini ve ber-vech-i muharrer mavnacılara îcârdan imtinâ‘ eylediklerini ikrâr ve li-ecli’t-tahkīk istikşâf-i hâl için medîne-i mezbûrede Sipâhpazarı ahâlisinden el-Hâc Mehmed Ağa b. Ali ve el-Hâc Mustafa b. Ali ve el-Hâc Mahmud b. Mustafa ve el-Hâc Mehmed b. Osman ve Osman Ağa b. Hüseyin ve diğer el-Hâc Mustafa b. Ali ve es-Seyyid el-Hâc İbrahim b. es-Seyyid Ahmed ve Sun‘ullah Efendi b. Mehmed Salih ve el-Hâc Ahmed b. İbrahim ve Abdurrahman Ağa b. Ahmed ve es-Seyyid Ahmed b. Mustafa ve Yusuf b. Abdullah ve es-Seyyid Hafız Mustafa Efendi b. es-Seyyid Mehmed ve el-Hâc Mehmed Ağa b. Halil nâm kimesneler istintâk olunduklarında mezbûr Mustafa Efendi kayıkhânesine otuz seneden beri müstakıllen mavna çekilegelip ve mezbûr Mehmed Ataullah Efendi’nin kayıkhânesine kadîmden beri bir aded ateş kayığı ve ba‘zan üç dört sene bir aded at kayığı ve mâ‘adâsına piyâde çekilegeldiğini ahâli-i mezbûrûndan herbiri haber vermeleriyle bu misillü mevâd re’y-i rezîn-i hazret-i veliyyü’l-emre menût olmağla imtisâlen li’l-emri’l-âlî huzûr-ı âlîlerine i‘lâm olundu. Fî 22 min-M sene 1207.