Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 852 Hüküm no: 1439 Orijinal metin no: [119b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Halil’in yanında bulunan küçük oğlu Mehmed’in nafaka bedelinden birikmiş alacağı olduğu Ma‘rûz Medîne-i Üsküdar’da Selami mahallesinde sâkine mu‘arrefetü’z-zât Fatıma bt. Halil nâm hatun medîne-i mezbûrede mahfil-i Bâb’da meclis-i şer‘-i hatîrde zevc-i sâbıkı es-Seyyid Mustafa b. Bektaş mahzarında mezbûr es-Seyyid Mustafa zevcim olup beni tatlîk etmekle mezbûrun firâşından hâsıl ve benden mütevellid işbu hâzır bi’l-meclis es-Seyyid Mehmed nâm sagīrin nafakası’çün zevcim mezbûr üzerine külle yevmin takdîr olunan üçer para nafaka-i mefrûzasından bin iki yüz dört senesi Şa‘bâni’l-mu‘azzam’ın on sekiz[inci] gününden işbu târih-i i‘lâm şehrinin on ikinci gününe gelince yirmi dokuz ayda mezbûr es-Seyyid Mustafa zimmetinde müctemi‘a olan altmış beş guruş on parayı taleb ederim deyü da‘vâ ol dahi cevâbında ancak külle yevmin ikişer para farz olunup kırk üç buçuk guruş deyni olduğunu ikrâr ziyâde yirmi bir buçuk guruş on para deyni olduğunu ve ziyâde birer para farz ve takdîr olunduğunu inkâr etmeğin müdde‘iye-i mezbûre ber-vech-i muharrer ziyâde müdde‘âsını es-Seyyid Mustafa b. Hasan ve Memiş Çelebi b. Mustafa nâm kimesneler şehâdetleriyle ber-nehc-i şer‘î isbât etmeğin mûcibiyle meblağ-ı mecmû‘-ı mefrûz-ı mezkûr altmış beş guruş on parayı müdde‘iye-i mezbûreye edâya mezbûr es-Seyyid Mustafa’ya şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 29 min-M sene 1207.