Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 853 Hüküm no: 1440 Orijinal metin no: [120a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in boşandığı kocasından hamile olduğu anlaşıldığından yeni kocası ile nikâhlarının geçersiz sayıldığı Ma‘rûz Medîne-i Üsküdar’a muzâfe Adalar nâhiyesine tâbi‘ Samandıra karyesinde sâkine mu‘arrefetü’z-zât Hadice bt. Mehmed nâm hatun medîne-i mezbûrede mahfil-i Bâb’da meclis-i şer‘-i hatîrde İbrahim b. Süleyman nâm kimesne mahzarında ben gāib ani’l-meclis Kansız Mustafa nâm kimesnenin mehr-i müeccel-i ma‘lûme ile zevce-i medhûlün-bihâsı iken târih-i i‘lâmdan sekiz ay mukaddem beni tatlîk edip ba‘dehû iki ay mürûrunda iddetim münkaziye olmuş zu‘muyla mezbûr İbrahim on altı guruş mehr-i müeccel tesmiyesiyle huzûr-ı Müslimînde nefsimi tezvîc edip ol dahi ber-vech-i muharrer tezevvüc ve duhûl edip akd-i mezkûr mün‘akid olmuşdu lâkin zevc-i mutallıkım mezbûr Kansız Mustafa’nın firâşından hâsıl hâlâ sekiz aylık hamlim olduğu zâhir ve âşikâr olmağla zevcim mezbûr İbrahim bana hâlâ izdivâc mu‘âmelesi eder akd-i mezbûrun fesâdına binâen kıbel-i şer‘den hüküm [taleb] ederim dedikde mezbûr İbrahim istintâk olundukda fi’l-hakīka müdde‘iye-i mezbûrenin takrîr-i meşrûhası üzere olduğunu mezbûr İbrahim ikrâr ve i‘tirâf etmeğim mûcibiyle beynlerinde kāim olan nikâhı fâsid ve beynleri tefrîk olunduğu bi’l-iltimâs huzûr-ı âlîlerine i‘lâm olundu. Fî 10 min-M sene 1207.