Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 853 Hüküm no: 1441 Orijinal metin no: [120a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Kocasar’ın ölen İsador’dan devrini aldığı Veliyüddin Ağa Vakfı’na ait menzile vârislerin müdahale edemeyeceği Ma‘rûz Mahmiye-i İslâmbol hısnı ebvâbından Kumkapı kurbünde mütemekkin Kuyumcu Kocasar v. Kigork nâm zimmî medîne-i Üsküdar’da mahfil-i Bâb’da meclis-i şer‘-i hatîrde ashâb-ı hayrâtdan Veliyüddin Ağa Vakfı mütevellisi es-Seyyid Mehmed Emin Efendi hâzır olduğu hâlde medîne-i mezbûrede Yenimahalle’de mütemekkin iken bundan akdem hâlik olan İsador v. Zağra nâm zimmînin sulbiye kebîre kızları şahısları mu‘arrefe Antran ve Deruhi ve Kaytafa nâm Nasrâniyeler ile sulbî sagīr oğlu Horzum’un bâ-hüccet-i şer‘iye mansûbe vasîsi mersûme Antran Nasrâniye muvâcehelerinde hâlik-i merkūm İsador zimmî bin iki yüz iki senesi Muharrem’inin yirmi yedinci günü yedimden istidâne ve kabz eylediği üç yüz guruş ve bir def‘a iki yüz guruş ve bi-şarti’r-rücû‘ emriyle gāib ani’l-meclis Kassâb İsador zimmîye def‘ ve teslîm eylediğim yüz elli guruş ki cem‘an altı yüz guruş deyni mukābilesinde işbu yedimde olan bir kıt‘a temessük mantûkunca mahalle-i mezbûrede vâki‘ vakf-ı mezbûr musakkafâtından bir bâb menzilini vefâen ferâğ edip ba‘dehû bin iki yüz dört senesi Muharremi gurresinde meblağ-ı merkūm altı yüz elli guruşu hâlik-i merkūmun hayatında kendüden mutâlebe ve edâdan âciz oldukda üç yüz elli guruş dahi an-nakdin yedine teslîm etmemle cem‘an bin guruşa iblâğ ve hâlik-i merkūm dahi ferâğ-ı kat‘î-i mu‘teber ile menzil-i mezkûru bana ferâğ ve tefvîz etmişken evlâdları merkūmât fuzûlî zabt murâd ederler suâl olunup menzil-i mezkûr tahliye ve bana teslîme tenbîh olunmak matlûbumdur deyü da‘vâ onlar dahi cevâblarında babaları hâlik-i merkūmun müdde‘î-i merkūm Kocasar zimmîye ancak yedi yüz guruş deyni olduğunu ikrâr ziyâde üç yüz guruş bilâ-devr murâbaha olduğunu iddi‘â birle müdde‘î-i merkūmun takrîri üzere babaları hâlik-i merkūmun def‘a-i sâniyede dahi ferâğ-ı kat‘î-i mu‘teber ile ferâğını inkâr ve meblağ-ı merkūm mukābilesinde ferâğ bi’l-vefâ ile fâriğ olduğunu iddi‘â etmeleriyle merkūmât Antran ve Deruhi ve Kaytafa Nasrâniyeler tasaddî eyledikleri murâbahayı beyândan izhâr-ı acz edip talebleriyle müdde‘î-i merkūm Kocasar zimmî gıbbe’t-tahlîfi’ş-şer‘î merkūmât bilâ-beyyine murâbaha da‘vâsından ba‘de’l-men‘ mersûmât Antran ve Deruhi ve Kaytafa def‘a-i sâniyede meblağ-ı merkūm mukābilesinde ferâğ bi’l-vefâ ile fâriğ olduğunu isbâtdan ba‘de’l-acz müdde‘î-i merkūm Kocasar zimmî ber-vech-i muharrer hâlik-i merkūm hayatında menzil-i mezkûru ferâğ-ı kat‘î-i mu‘teber ile ferâğ ve tefvîz eylediğini lede’t-tezkiye udûlden olan Gaspar v. Karabet ve Asvador v. Artin nâm zimmîler şehâdetleriyle ber-nehc-i şer‘î muvâcehelerinde isbât etmeğin mûcibiyle menzil-i mezkûru tahliye ve müdde‘î-i merkūm Kocasar zimmîye teslîme mersûmât Antran ve Deruhi ve Kaytafa’dan herbirine şer‘an tenbîh olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 15 min-Muharremi’l-harâm sene 1207.