Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 857 Hüküm no: 1448 Orijinal metin no: [120b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbti Mahmud’un kefaletinden dolayı alacağı olduğu iddiasıyla Kıbti Hasan’a açtığı davada iddiasını ispat edemediği Ma‘rûz Medîne-i Üsküdar’da Solaksinan mahallesinde sâkin Mahmud b. Mehmed nâm Kıbtî mahfil-i Bâb’da meclis-i şer‘-i hatîrde Hasan b. Mehmed nâm Kıbtî mahzarında mezbûr Hasan’ın gāib ani’l-beled Karaçavuş demekle ma‘rûf Mehmed nâm Kıbtiye bârgir semeninden deyni olan yirmi yedi guruşun edâsına emriyle bundan akdem ben kefîl ve zâmin olup târih-i i‘lâmdan dört ay mukaddem mezbûr Mehmed Hersek kazâsında benden meblağ-ı merkūm yirmi yedi guruşu kefâlete binâen ahz etmekle meblağ-ı merkūm yirmi yedi guruşu bana tazmîn eylemek murâdımdır deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyâna kādir olamayıp talebiyle mezbûr Hasan gıbbe’t-tahlîfi’ş-şer‘î mûcibiyle müdde‘î-i mezbûr husûs-ı mezkûrda mezbûr Hasan’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 2 min-S sene 1207.