Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 858 Hüküm no: 1449 Orijinal metin no: [120b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Numan Beyefendi ile Sebzeci Seyyid İbrahim’in alacak davasında sulh oldukları Ma‘rûz Medîne-i Üsküdar’da Rum Mehmedpaşa mahallesinde sâkin eş-Şeyh Numan Beyefendi b. Ali Paşa tarafından ber-vech-i âtî vekîl olduğu Ahmed b. Mehmed ve Abdullah b. Hasan nâm kimesneler şehâdetleriyle sâbit olan es-Seyyid eş-Şeyh Mehmed Şûhî Efendi b. Ali medîne-i mezbûrede mahfil-i Bâb’da meclis-i şer‘-i hatîrde Sebzeci es-Seyyid İbrahim b. es-Seyyid Mehmed mahzarında müvekkilim Şeyh-i mûmâ-ileyh sâbıkā mahrûse-i Galata’da vâki‘ Mevlevîhâne Zâviyesi’nde post-nişîn iken mezbûr es-Seyyid İbrahim zâviye-i mezbûre fukarâsına meşrûta mukāta‘alı iltizâm ve bedelinden bâkī yetmiş guruş ve beynlerinde ma‘lûm akçe fâizi için verdiği elli guruş ve rüşvet nâmıyla verdiği yirmi beş guruş kıymetli çuka ve otuz guruş hediyeli bir Mushaf-ı şerîf ki cem‘an yüz yetmiş beş guruşu taleb ederim deyü da‘vâ ve mezbûr es-Seyyid İbrahim cevâbında mukāta‘a bedelinden bâkī yetmiş guruşu ikrâr ziyâdeyi inkârından mâ‘adâ mûmâ-ileyh eş-Şeyh Numan Beyefendi’nin kethudâları hâzır bi’l-meclis Mehmed Sadık Efendi yedimden iştirâ ve kabz eylediği sebze semeninden bâkī yüz dört guruşu ve hâric ez-tahvîl yüz guruş ki cem‘an iki yüz dört guruşu taleb ederim deyü da‘vâ ve beynlerinde ba‘de vukū‘i’l-münâza‘a bâ-tavassut-ı muslihîn mûmâ-ileyh Numan Beyefendi mâlından mezbûr es-Seyyid İbrahim’e bi-tarîki’s-sulh elli guruş def‘ ü teslîm etdikde ol dahi ahz ü kabz edip ziyâde müdde‘âsı olan yüz elli dört guruşa ve mûmâ-ileyh Numan Beyefendi [121a] dahi müdde‘âsı olan yüz yetmiş beş guruşa ve sâire müte‘allika âmme-i de‘âvîden herbiri âharın bi’l-asâle ve bi’l-vekâle zimmetini ibrâ ve ıskāt ve herbiri âharın ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 6 min-M sene 1207.