Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 859 Hüküm no: 1451 Orijinal metin no: [121a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simidci Nikola’nın ticaret ortaklığından dolayı Simidci Nikola’dan alacağı olduğu Ma‘rûz Medîne-i Üsküdar’a tâbi‘ Bulgurlu karyesinde simidci fırınında mütemekkin Simidci Nikola v. Mino nâm zimmî medîne-i mezbûrede mahfil-i Bâb’da meclis-i şer‘-i hatîrde yine Simidci diğer Nikola v. Yani nâm zimmî muvâcehesinde merkūm diğer Nikola zimmî ile simitçilik ticâretinde fâide beynimizde münâsafeten olmak üzere akd-i şirket edip ve fırın-ı mezkûrda tabh ve âhara bey‘ eylediğimiz simidden üç ayda hâsıla olan altmış dört guruş fâidenin yirmi dört guruşunu ba‘de ihrâci’l-mesârif kırk guruşu merkūm diğer Nikola zimmî zimmetinde kalmağla meblağ-ı merkūm kırk guruşdan hisseme isâbet eden yirmi guruşu taleb ederim deyü da‘vâ ol dahi ikrâr ü i‘tirâf edip lâkin müdde‘î-i merkūm dahi kezâlik âhara bey‘ eylediği yirmi üç çuval dakīkin simidinden şühûr-ı mezkûrede hâsıla olan yüz on guruş fâideyi ahz ü kabz edip zimmetinde kalmağla meblağ-ı merkūmdan benim hisseme isâbet eden elli beş guruşu taleb ederim deyü ba‘de’d-da‘vâ ve’l-inkâr merkūm diğer Nikola zimmî ber-vech-i muharrer elli beş guruş müdde‘âsını beyândan izhâr-ı acz edip talebiyle müdde‘î-i merkūm gıbbe’t-tahlîfi’ş-şer‘î mûcibiyle merkūm diğer Nikola zimmî elli beş guruş mutâlebesiyle bilâ-beyyine mu‘ârazadan ba‘de’l-men‘ mukırr u mu‘terif olduğu meblağ-ı merkūm yirmi guruşu müdde‘î-i merkūm Nikola zimmîye edâsıyla merkūm diğer Nikola zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 2 min-S sene 1207.