Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 859 Hüküm no: 1452 Orijinal metin no: [121a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadoluhisârı ağaları tımarı arazisinden olan Ortaköy’ün Haseki Ali Ağa’ya iltizama verildiği Ma‘rûz Medîne-i Üsküdar’a tâbi‘ Orta karyesinin iltizâmen subaşısı Haseki Ali Ağa b. Osman nâm kimesne medîne-i mezbûrede mahfil-i Bâb’da meclis-i şer‘-i hatîrde takrîr-i kelâm edip karye-i mezbûre Anadoluhisârı ağaları tımarı arâzisinden olmağla bin iki yüz altı senesi martı ibtidâsından Şubatı gāyetine gelince bir sene-i kâmile zabt ve ta‘şîr etmek üzere bin yüz guruş bedel mukābilesinde bana ilzâm ben dahi ba‘de’l-iltizâm karye-i mezbûre bâgātının maktû‘ mukāta‘ası olup makbûzum olan iki yüz kırk altı guruş ve a‘şâr-ı şer‘iyeden keyl-i İslâmbolî olmak üzere yüz altmış bir keyl hınta ve yüz keyl şa‘îr ve yüz otuz keyl alef ve beş keyl burçak altı keyl keten tohumu ve bir keyl bakla ve yüz vakıyye soğan öşr mahsûlü makbûzum olup ziyâde makbûzum olmamağla husûs-ı mezkûr karye-i mezbûre ahâlisinden istifsâr ve hakīkati i‘lâm olunmak matlûbumdur dedikde karye-i mezbûre ahâlisinden İmâm Abdullah Efendi [b.] Mustafa ve İskender Bey b. Hüseyin ve Veliyüddin b. el-Hâc Süleyman ve Bekir Beşe b. Ahmed ve Yasakcı Ahmed b. Ahmed ve Ömer b. Osman ve Ali b. Osman ve es-Seyyid Ömer b. Hüseyin ve Mehmed b. Osman ve Mehmed b. Ahmed ve Mehmed Said b. Hasan ve es-Seyyid Ömer b. Mustafa ve Hüseyin b. Hamza ve Mehmed b. Mustafa nâm kimesneler meclis-i şer‘a hâzırûn olup istihbâr olunduklarında fi’l-hakīka hâl subaşı-i mezbûrun bâlâda bast u beyân ve tafsîl ve ayân eylediği minvâl üzere olduğunu ahâli-i mezbûrûndan herbiri haber verdikleri bi’l-iltimâs huzûr-ı âlîlerine i‘lâm olundu. Fî ( ) min-S sene 1207.