Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 861 Hüküm no: 1456 Orijinal metin no: [121b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm’ün kocası Kavaklı Salih’in ölümüne sebep oldukları iddiasıyla Hacı Ali ve Ömer aleyhine açtığı davada iddiasını ispat edemediği Ma‘rûz Medîne-i Üsküdar’a muzâfe Adalar nâhiyesine tâbi‘ Yakacık karyesinde sâkin iken vech-i âtî üzere fevt olan katîlen fevt Kavaklı Salih b. Feyzullah’ın verâseti zevcesi Ümmügülsüm bt. Yakub nâm hatun ile sulbî sagīr oğlu Salih’e münhasıra olup ba‘dehû sagīr-i mezbûr Salih fevt olup verâseti anası mezbûre Ümmügülsüm ile li-ebeveyn karındaşı oğlu Ahmed nâm kimesneye inhisârı tahakkukundan sonra zâtı vech-i şer‘î üzere mu‘arrefe olan mezbûre Ümmügülsüm Hatun medîne-i mezbûrede mahfil-i Bâb’da meclis-i şer‘-i hatîrde karye-i mezbûre sükkânından el-Hâc Ali b. Mustafa ve Ömer b. İbrahim nâm kimesne tarafından vekîl-i şer‘îsi İmâm Ali Efendi b. Abdurrahim mahzarlarında bin iki yüz altı senesi Şevvâli’l-mükerremi’nin dördüncü günü vakt-i duhâda karye-i mezbûre hâricinde bağlar dâhilinde mezbûr el-Hâc Ali’nin emriyle mezbûr Ömer tüfenk kurşunuyla ve gāib ani’l-beled Mehmed Ali oğlu İsmail kurşun ve bıçak ile ve Resuloğlu Ahmed ve Hâcı Kethudâoğlu Ahmed ve karındaşı İsmail nâm kimesnelerden herbiri kurşun ve bıçak ile zevcim mezbûr Salih’in batnı üzerinden bi-gayrı hakkın darb ve cerh ve dokuz gün mürûrunda müte’essiren fevt olmağla mûcib-i şer‘îsini bi’l-verâse taleb ederim deyü da‘vâ ve mezbûrân cevâblarında müteveffâ-yı mezbûr Salih ve refîkleri Kalyoncuoğlu Mehmed ve Karagürleoğlu Mustafa kendi hâllerinde olmayıp sâ‘i bi’l-fesâd olup âlât-ı harble geşt ü güzâr ve nisvân ve sıbyân ve ehl-i ırz makūlelerine ta‘arruz ve ol-vechile i‘lân-ı bağy ü tuğyân etmeleriyle kıbel-i şer‘den i‘tâ olunan bir kıt‘a mürâsele mûcebince ber-vech-i muharrer mecrûh olup ve yedi gün mürûrunda cerh-i mezkûr kendi taksîrâtım sebebiyle olup müte’essiren fevt yâhûd ber’-i tam hâsıl oldukdan sonra a‘zâma illet hudûs eder ise bi’l-cümle husûs-ı mezkûra müte‘allika âmme-i de‘âvîden mezbûrun el-Hâc Ali ve Ömer ve İsmail ve diğer İsmail ve Hâcı Kethudâoğlu Ahmed ile sâir ahâli-i mezbûrenin zimmetlerini ibrâ ve ıskāt etmişdir deyü takrîrlerine mutâbık mürâsele ve ibrâ hücceti ibrâzıyla ba‘de’d-def‘ ve’l-inkâr mezbûrân el-Hâc Ali ve imâm Ali Efendi ber-vech-i muharrer eyledikleri def‘lerini udûlden ve Kartal kasabası ahâlisinden el-Hâc Mehmed b. el-Hâc Mustafa ve Hüseyin Beşe b. Mehmed nâm kimesneler şehâdetleriyle mezbûre Ümmügülsüm muvâcehesinde isbât etmeğin mûcibiyle müdde‘iye-i mezbûre Ümmügülsüm Hatun husûs-ı merkūmda bî-vech mu‘ârazadan men‘ olunduğu rızâlarıyla tescîl ve mübâşiri çavuş kulları iltimâsıyla huzûr-ı âlîlerine i‘lâm olundu. Fî 7 min-S sene 1207.