Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 862 Hüküm no: 1457 Orijinal metin no: [121b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Osman’ın izinsiz evine girip bazı mallarını aldıkları iddiasıyla eski kayınatasına açtığı davadan vazgeçtiği Ma‘rûz Medîne-i Üsküdar’da Hayreddin Çavuş mahallesinde sâkin Molla Osman b. Mehmed nâm kimesne medîne-i mezbûrede mahfil-i Bâb’da meclis-i şer‘-i hatîrde sâbıkā kayınvâlidesi [kayınatası] İbrahim b. Mehmed mahzarında mezbûr İbrahim’in sâkin olduğu menzili medîne-i mezbûrede Vâlide-i Atik mahallesinde vâki‘ menzilime muttasıl olup târih-i i‘lâmdan üç gün mukaddem kendi ve gāibûn ani’l-meclis zevcesi Âişe Hatun ve kızı Habibe ve oğlu Süleyman fuzûlî menzilime herbiri duhûl ve menzilimin bir aded temel direğini ve üç cam çârçûbelerini ahz ü gasb etmeleriyle taleb eylediğimde mûcib-i ta‘zîr olur elfâz-ı kabîha ile şetm etmeleriyle mûcib-i şer‘îsini taleb ederim deyü eylediği da‘vâsından bâ-tavassut-ı muslihîn meccânen fâriğ olup husûs-ı mezkûra müte‘allika âmme-i de‘âvîden mezbûr İbrahim’in zimmetini ibrâ ve ıskāt eyledikde ol dahi ibrâsını kabûl ve fîmâ-ba‘d mezbûr Molla Osman’ın ber-vech-i muharrer menziline duhûl etmemek üzere ta‘ahhüd ve gāibûn-ı merkūmun dahi mezbûr Molla Osman’ın menziline bir dahi duhûl ederler ise ba‘de’s-sübût lâzım gelen zararlarına ve hîn-i mutâlebede huzûr-ı hükkâm-ı zevi’l-ihtirâma ihzârlarına tekeffül edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 2 min-Safer sene 1207.