Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 863 Hüküm no: 1458 Orijinal metin no: [121b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in kendisini bıçak ile yarayalan Bostancı Ali’yle sulh olduğu Ma‘rûz Medîne-i Üsküdar’da Vâlide-i Atik mahallesinde sâkin sâhib-i arzuhâl Mehmed b. İbrahim medîne-i mezbûrede mahfil-i Bâb’da meclis-i şer‘-i hatîrde arzuhâlde ismi mezkûr Bostanî Ali b. Mehmed mahzarında târih-i i‘lâmdan bir ay mukaddem mezbûr Bostanî Ali medîne-i mezbûrede Karacaahmed Sultan Türbesi’ne karîb mahâlde vakt-i mağribde bi-gayrı hakkın amden bıçak ile sol gözüm kaşı üzerinden darb ve cerh ve hâlâ cerh-i mezkûre ber’-i tam hâsıl olup lâkin zikr olunan basarımın rü’yetine darbından nâşi za‘af târî olmuşdu deyü tasaddî eylediğim da‘vâmdan bâ-tavassut-ı muslihîn dört guruş bedel-i makbûza mezbûr Bostanî Ali ile sulh olup husûs-ı mezkûra müte‘allika âmme-i de‘âvîden mezbûr Bostanî Ali’nin zimmetini ba‘de’l-ibrâ ve’l-kabûl kat‘-ı münâza‘a eyledikleri mübâşiri Ali Çukadâr kulları iltimâsıyla huzûr-ı âlîlerine i‘lâm olundu. Fî 5 min-Za sene 1206.