Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 863 Hüküm no: 1459 Orijinal metin no: [121b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Ahmed’in kendisini on sene önce Kısıklı köyünde bıçakla yaraladığı iddiasıyla Ahmed Beşe’ye açtığı davada iddiasını ispat edemediği Ma‘rûz Medîne-i Üsküdar’a tâbi‘ Bulgurlu[‘da] sâkin Molla Ahmed b. el-Hâc Mehmed medîne-i mezbûrede mahfil-i Bâb’da meclis-i şer‘-i hatîrde diğer Ahmed Beşe b. İsmail mahzarında mezbûr diğer Ahmed Beşe târih-i i‘lâmdan on sene mukaddem karye-i mezbûrede Kısıklı nâm mahâlde bi-gayrı hakkın bıçak ile sol omuzum başından bir yerinden darb ve cerh edip cerh-i mezkûra beri’-i tam hâsıl ve kolumun batşına dahi halel gelmeyip lâkin mecrûh olduğum hînde cerh-i mezkûrun ber’i için merhem bahâ olarak cerrâha def‘ ü teslîm eylediğim yüz guruşu mezbûr diğer Ahmed Beşe’den taleb ederim deyü da‘vâ ol dahi cevâbında müdde‘î-i mezbûru cerh eylediğini bi’l-külliye inkâr etmeğin müdde‘î-i mezbûr ber-vech-i muharrer müdde‘âsını beyânından izhâr-ı [acz] edip talebiyle mezbûr diğer Ahmed Beşe gıbbe’t-tahlîfi’ş-şer‘î mûcibiyle müdde‘î-i mezbûr da‘vâ-yı mezkûresiyle mezbûr diğer Ahmed Beşe’ye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 8 min-S sene 1207.