Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 864 Hüküm no: 1460 Orijinal metin no: [122a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Menzilcisi Mehmed Ağa’nın atının kuyruğunu koparan Tatar Hacı Bekir’in zararı karşılaması Ma‘rûz Hâlâ medîne-i Üsküdar Menzilcisi Mehmed Ağa b. Memiş nâm kimesne tarafından ber-vech-i âtî vekîl-i müseccel-i şer‘îsi olan Osman b. Abdullah medîne-i mezbûrede mahfil-i Bâb’da meclis-i şer‘-i hatîrde Tatar el-Hâc Bekir b. el-Hâc İbrahim mahzarında mezbûr el-Hâc Bekir târih-i i‘lâmdan on gün mukaddem Gekvize menzilhânesinden Üsküdar’a gelmek için yetmiş guruş kıymetli bir re’s kır bârgire rükûb ve esnâ-i râhda bârgir-i merkūmun kuyruğunu koçan ta‘bîr olunur mahâllinin sülüs mikdârını kat‘ edip ol-vechile bârgir-i mezkûrun kıymetine noksân terettüb etmekle noksân kıymetini taleb ederim deyü da‘vâ mezbûr el-Hâc Bekir cevâbında bârgir-i merkūmun kuyruğunu ol-vechile kat‘ını ikrâr ve kıymeti ol-mikdâr olduğunu inkâr edip zikr olunan bârgir ehl-i hibreden Abdi Ağa b. Hasan ve Mehmed Ağa b. el-Hâc Muslı nâm kimesnelere irâe olundukda kuyruğu maktû‘ olunduğu hînde yirmi guruş eder kuyruğu kat‘ olmadığı hînde elli guruş eder deyü herbiri ba‘de’l-ihbâr mûcibiyle noksân semeni olan otuz guruşu müdde‘î-i merkūma edâ ve teslîme mezbûr el-Hâc Bekir’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 9 min-S sene 1207.