Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 864 Hüküm no: 1461 Orijinal metin no: [122a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berberoğlu Halil tarafından tüfekle yaralandığını iddia eden Mehmed’in talebi üzerine durumunun incelendiği Ma‘rûz Medîne-i Üsküdar’da muzâfe Yoros nâhiyesine tâbi‘ Depeviran karyesinde sâkin vech-i âtî üzere kurşun yarasıyla mecrûh olan Mehmed b. İbrahim medîne-i mezbûrede mahfil-i Bâb’da meclis-i şer‘-i hatîrde bast-ı kelâm ve ifâde-i merâm edip yine karye-i mezbûre sükkânından gāib ani’l-meclis Berberoğlu Halil b. Ömer nâm kimesneler târih-i i‘lâmdan üç gün mukaddem karye-i mezbûrede kendi tarlamda çift sürer iken vakt-i asrda bi-gayrı hakkın tüfenk kurşunuyla sol elimin keffinden darb ve zahrından hurûc ve sağ omuzum başından dahi piştov kurşunuyla darb ve cerh etmekle keşf ve mu‘âyene olunmak matlûbumdur dedikde cerrâh tâifesinden el-Hâc Ali ve sâir mazbûtü’l-esâmî kimesneler ile mecrûh-ı mezbûrun a‘zâsına nazar olundukda fi’l-hakīka mezbûr Mehmed ber-vech-i muharrer iki mahâllinden kurşun yarasıyla mecrûh idiği lede’l-keşf ve’l-mu‘âyene zâhir olduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 10 min-S sene 1207.