Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 867 Hüküm no: 1467 Orijinal metin no: [122b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal kayığında bıçakla öldürülen Dimitri’nin cesedinin tahkiki Ma‘rûz Sâdır olan fermân-ı âlîlerine imtisâlen kıbel-i şer‘-i şerîfden mürsel Abdullah Efendi dâ‘îleri ve izzetli bostancıbaşı ağa tarafından müte‘ayyin Çukadâr Ali ve Kādı karyesi subaşısı ve sâir mazbûtü’l-esâmî Müslimîn ile medîne-i Üsküdar’a tâbi‘ Kādı karyesi iskelesinde Kartal kayığında mecrûhan hâlik olan Dimitri zimmînin a‘zâsına nazar eylediklerinde hâlik-i merkūm göbeğinin sol tarafından kolu zirâ‘ından kurşun ensesinden bıçak yarasıyla mecrûhan hâlik olduğunu ba‘de’l-keşf ve’l-mu‘âyene keyfiyeti suâl olundukda hâlik-i merkūm Bahr-ı Sefîd adalarından İpsara Adası mütemekkinlerinden olup Limni cezîresinden Tekfurdağı İskelesi’ne nakl için on bir nefer kimesneyi sefîneye tahmîl ve Tekfurdağı İskelesi’ne geldiklerinde bizi Âsitâne’ye götürün deyü cebr ve ihtilâf-ı hava ile Burgos Adası kurbüne geldiklerinde on bir nefer kimesne mellâh-ı sefîneden yedi nefer kimesneyi katl ve deryâya ilkā ve merkūm Dimitri’yi dahi ber-vech-i muharrer darb ü cerh ve zikr olunan sefîne ile firâr ve gaybet etmeleriyle merkūm Dimitri mecrûhan ve hayyen Kartal kasabasına gelip takrîr ba‘dehû esnâ-i râhda hâlik oldu deyü ihbârlarını mezbûr dâ‘îleri mahâllinde ba‘de’t-tahrîr ve’l-inhâ zîr-i hâke ilkāya izin birle mübâşir-i merkūm iltimâsıyla huzûr-ı âlîlerine i‘lâm olundu. Fî 9 min-Safer sene 1207.