Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 867 Hüküm no: 1468 Orijinal metin no: [122b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Korucu Ali’nin kendisine isnat olunan şeylerle alakası olmayıp namuslu bir insan olduğuna bir çok kişinin şahitlik ettiği Ma‘rûz Bi’l-iltimâs kıbel-i şer‘-i şerîfden meb‘ûs Hafız Mehmed Efendi dâ‘îleri ve ümenâ-i şer‘le medîne-i Üsküdar hâricinde İbrahim Ağa Zâviyesi nâm mahâlde vâki‘ Dârü’s-sa‘âdeti’ş-şerîfe ağası hazretlerinin sa‘âdet-hânelerine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûre ahâlisinden gāib ani’l-meclis Korucu Ali b. Ahmed nâm kimesne tarafından ber-vech-i âtî vekîli Molla Ahmed b. Ali nâm kimesne meclis-i ma‘kūd-ı mezkûrda bi’l-vekâle takrîr-i kelâm edip müvekkilim gāib-i mezbûr Ali kendi hâlinde ırzıyla mukayyed ve kimesneye hilâf-ı şer‘-i şerîf vaz‘ ve hareket yoğiken bu esnâda ba‘zı kimesneler mezbûrun hakkında hilâf-ı inhâ kelimât isnâd ve mezbûru tekdîr sevdâsında olmalarıyla mezbûrun keyfiyet-i ahvâli karye-i mezbûre ahâlisinden suâl olunup hakīkati i‘lâm olunmak bi’l-vekâle matlûbumdur dedikde karye-i mezbûre ahâlisinden İmâm Mustafa Efendi b. Yusuf ve kuzâtdan Mustafa Efendi b. el-Hâc Mehmed ve kuzâtdan Süleyman Efendi b. el-Hâc İsmail ve es-Seyyid Ali b. Mehmed ve Çukadâr Hüseyin Ağa b. Ahmed ve Mumcu Kasım Ağa b. Süleyman ve Çukadâr Abdullah Ağa b. Feyzullah ve Ketânî Mehmed Ağa b. Abdullah ve Mehmed Beşe b. İsmail ve Kürd Veli b. Bekir ve Mehmed Beşe b. Hüseyin ve Mustafa Beşe b. Mahmud ve Yusuf b. Osman ve Abdullah b. Receb ve Mustafa b. Ali nâm kimesneler meclis-i ma‘kūd-ı mezkûra hâzırûn olup istifsâr olunduklarında fi’l-hakīka gāib-i mezbûr Ali kendi hâlinde ırzıyla mukayyed ve kimesneye hilâf-ı şer‘-i şerîf ve kānûn-ı münîf vaz‘ ve hareketi mesbûk olmadığı ma‘lûmumuz olup gāib-i mezbûrun hakkında isnâd olunan kelimât iftirâ ve bühtân-ı azîm ve kizb-i sarîh olduğunu herbiri haber verdiklerini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 8 min-S sene 1207.