Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 868 Hüküm no: 1470 Orijinal metin no: [122b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin bazı emlakını haksız yere zabt ettiği iddiasıyla kardeşi oğluna açtığı davadan vazgeçtiği Ma‘rûz Medîne-i Üsküdar’da Kefçe mahallesinde sâkin Halil Beşe b. Süleyman medîne-i mezbûrede mahfil-i Bâb’da meclis-i şer‘-i hatîrde li-ebeveyn er karındaşı oğlu Abdüllatif b. Mehmed Zeynel mahzarında târih-i i‘lâmdan on iki sene mukaddem Vilâyet-i Rumeli’nde Ostrova kazâsına tâbi‘ Zagoriçe karyesinde vâki‘ emlâkimden herbiri ma‘lûmü’l-hudûd bir kıt‘a kürûmu mülk bağ ve bir kıt‘a menzil ve on beş keyl tohum isti‘âb eder bir kıt‘a tarla ve bir re’s bârgir ve bir tek öküzümü fuzûlî zabt ve iskân ve bağ-ı mezkûrun ve tarla-yı mezkûru zirâ‘at ile beher sene ellişer guruşdan işbu tarihe gelince altı yüz guruş hâsılâtı ber-vech-i muharrer ahz ü kabz etmekle taleb ederim deyü da‘vâ ve mezbûr Abdüllatif cevâbında ancak iki sene ammim mezbûr Halil Beşe’nin zikr olunan emlâkinde kendi emriyle hizmet ve kendiden lâzım gelen rüsûmât ve tekâlifi mahsûlâtından edâ eylediğimden mâ‘adâ bi-şarti’r-rücû‘ emriyle yüz on guruş deynini dahi edâ etmemle meblağ-ı merkūm yüz on guruş ile seneteyn-i mezkûreteynde sebk eden hizmetimin ecr-i mislini taleb ederim deyü da‘vâ ve beynlerinde ba‘de vukū‘i’l-münâza‘a beynlerine muslihûn tavassut edip herbiri eyledikleri da‘vâlarından meccânen fâriğler olup bi’l-cümle husûs-ı mezkûra müte‘allika âmme-i de‘âvîden herbiri âharın zimmetini ibrâ ve ıskāt ve herbirleri âharın ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 15 min-S sene 1207.