Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 869 Hüküm no: 1471 Orijinal metin no: [122b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Hanparsom ile diğer manavların dükkânlarında sebze satmaması için sebzeciler esnafının ferman çıkarılmasını istedikleri Ma‘rûz Medîne-i Üsküdar’da vâki‘ sebzevâtcı esnâfından Hamam-ı sagīr kurbünde Bodur Mustafa ve Kolluk kurbünde Küçük ve Cedîd Vâlide Câmi‘i kurbünde Sarı Mehmed ve Çakır Ahmed ve İbrahim ve Yeniçeşme’de Arnabud Salih ve Hacı Mehmed ve Toptaşı’nda Ali ve Doğancılar’da Hüseyin ve Mirâhor mahallesinde es-Seyyid Hüseyin nâm kimesneler meclis-i şer‘-i hatîrde medîne-i mezbûrede Atpazarı hâricinde vâki‘ manav dükkânında Manav Hanparsom v. Bogos nâm zimmî muvâcehesinde herbiri takrîr-i kelâm edip ez-kadîm medîne-i mezbûrede bâlâda isimleri mezkûr on aded sebzeci dükkânı olup ziyâde olmamak üzere şurût-ı nizâmımızdan olup sebze bey‘i bizlere mahsûs ve bizim metâ‘ımıza manav tâifesi dahl ü ta‘arruz etmemek nizâm-ı kadîmimizden iken bu esnâda merkūm Hanparsom zimmî dükkânında kendiye mahsûs olan meyve makūlesini bey‘e kanâ‘at etmeyip hilâf [ve] mugāyir-i nizâm sebzevâtcı tâifesine mahsûs olan sebze makūlesini bey‘ ve ol-vechile nizâm-ı kadîmimizin ihtilâline bâ‘is ve bâdî olmağla men‘ ü def‘ olunmak matlûbumuzdur deyü teşekkî etdiklerinde ol dahi cevâbında ber-vech-i muharrer dükkânında sebze makūlesini bey‘ini ikrâr ve mugāyir-i nizâm [123a] dükkânında sebzevâtcı tâifesine mahsûs olan sebze makūlesini bey‘den men‘ ü def‘ olunup işbu nizâm ilâ-mâşâallâh düstûrü’l-amel tutulmak bâbında tuğrâ-yı garrâ ile müvaşşah bir kıt‘a fermân-ı âlî-şân sudûrunu mezbûrûndan herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 7 min-Safer sene 1207.