Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 870 Hüküm no: 1472 Orijinal metin no: [123a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mezbahada kestiği hayvanların derilerini yüksek fiyatla başkalarına satan Debbağ Mehmed’in tazirle cezalandırılmasının istendiği Ma‘rûz Medîne-i Üsküdar’da vâki‘ Atik Vâlide Sultan tâbet serâhâ evkāfı musakkafâtından medîne-i mezbûrede Atpazarı dâhilinde binâ eylediği debbâğhânede müstecirler olan debbâğ esnâfından kethudâları Mustafa Ağa b. el-Hâc Osman ve ustalarından el-Hâc Mahmud Ağa b. Mustafa ve Hafız Mehmed Efendi b. Mustafa ve es-Seyyid Osman Ağa b. Ömer ve Abdullah Ağa b. el-Hâc Osman ve es-Seyyid Hasan b. Ahmed ve Osman b. Hüseyin ve Mehmed Emin b. el-Hâc Osman ve Ali b. Ömer ve Yakub b. İshak nâm kimesneler medîne-i mezbûrede mahfil-i Bâb’da meclis-i şer‘-i hatîrde medîne-i mezbûrede Cedîd Vâlide Sultan Câmi‘-i şerîfi kurbünde vâki‘ selhhâne ustası Mehmed b. İsmail mahzarında herbiri bast-ı kelâm ve ifâde-i merâm edip işbu yedimizde olan bir kıt‘a mübârek hatt-ı hümâyûn-ı şevket-makrûn ile müzeyyen ve tuğrâ-yı garrâ ile mu‘anven bir kıt‘a emr-i âlî-şân nâtık olduğu üzere debbâğhâne-i merkūmenin on iki aded hücerâtı olup kadîmden beri mîrî selhhânede kasabbaşı yediyle zebh olunan ağnâmın ve Galata ve Karaköy ve Beşiktaş ve Ortaköy ve Akındıburnu ve Kuruçeşme ve Yenihisâr ve Tarabya ve Sarıyar ve Büyükdere ve Beykoz ve Kanlıcak ve İstavros ve Çenger karyesi ve medîne-i mezbûrede Köprübaşı nâm mahâlden vakf-ı mezbûrun hudûduna gelince gerek hudûdu dâhilinde ve gerek medîne-i mezbûreye tâbi‘ olan karyelerde zebh olunan ağnâmın derileri bi’l-külliye vakf-ı mezbûrun debbâğhânesine gelip onda debâgat olunup âhar mahâlde bey‘ ve debâgat olunmamak meşrût ve vakfiye-i ma‘mûlün-bihâda ve vakıf defterinde musarrah ve mukayyed olup amel-i kadîm bu vechile olagelmişken bin iki yüz bir senesi Şevvâli’l-mükerrem’in on sekizinci gününde mahrûse-i Galata muzâfâtından Beşiktaş ve Ortaköy’de selhhâne ustaları olan iki nefer zimmîler hilâf-ı fermân ve mugāyir-i nizâm âhara hufyeten deri bey‘ eylediği mesmû‘umuz olmağla Galata Mahkemesi’nde merkūmân muvâcehesinde teşekkî ve ta‘ahhüdlerini hâvî ve bâlâsı fermân-ı âlî ile musahhah yedimize bir kıt‘a i‘lâm i‘tâ olunmuşken yine bu esnâda mezbûr Mehmed mugāyir-i hatt-ı hümâyûn selhhânesinde zebh eylediği hayvanâtın derilerini tama‘-ı hâmmından nâşi ziyâde bahâ ile hufyeten âhara bey‘ edip hattâ târih-i i‘lâm günü medîne-i mezbûrede Bülbülderesi nâm mahâlde çobanı yediyle âhara bey‘ için irsâl eylediği yirmi aded ağnâm derisi ahz olunup ol-vechile nizâm-ı kadîmimizin ihtilâline bâdî ve vakf-ı mezbûrun debbâğhânesi ta‘tîle bâ‘is olmağla zebh eylediği hayvanâtın derilerini âhara bey‘ etmeyip Yedikule debbâğlarının narh-ı cârîsi üzere ke’l-evvel bize bey‘a mezbûr Mehmed’e tenbîh olunmak matlûbumuzdur deyü takrîrine mutâbık bir kıt‘a hatt-ı hümâyûn ve bir kıt‘a fermân ve bir kıt‘a i‘lâm ibrâzıyla teşekkî etdiklerinde ol dahi çobanı yediyle zikr olunan yirmi aded ağnâm derisini âhara bey‘ için irsâl eylediğini ikrâr u i‘tirâf edip bu misillü hilâf-ı hatt-ı hümâyûn ve mugāyir-i nizâm harekete cesâret edenin ta‘zîri re’y-i âlîlerine menût olduğu ma‘lûm-ı devletleri buyuruldukda emr u fermân hazret-i veliyyü’l-emrindir. Fî 13 min-S sene 1207.