Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 871 Hüküm no: 1473 Orijinal metin no: [123a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Hasan’ın merhum Bezistânî Ahmed Ağa’ya olan borcunun bir kısmını peşin bir kısmını da otuz beş gün içerisinde vârislerine ödemeye söz verdiği Ma‘rûz Mevâdd-ı şer‘iye istimâ‘ı’çün bi’l-iltimâs kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’a [tâbi‘] Kādı karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde mahmiye-i İslâmbol’da Bağçekapısı kurbünde Hobyar mahallesinde sâkin iken bundan akdem fevt olan Bezistanî Ahmed Ağa b. Hüseyin’in verâseti zevce-i metrûkesi Havva bt. Ahmed nâm hatun ile sulbî kebîr oğulları es-Seyyid el-Hâc Mehmed Emin Ağa ve es-Seyyid Mustafa ve sulbiye kebîre kızları Hanife ve Hadice ve sagīre kızları Nesibe ve Emine’ye münhasıra ve tashîh-i meselesi bi-hükmi’l-ferâiz altmış dört sehmden sekiz sehmi zevcesi mezbûreye ve yedişer sehmden yirmi sekiz sehmi kızları mezbûrât Hanife ve Hadice ve Nesibe ve Emine’ye ve on dörder sehmden yirmi sekiz sehmi oğulları mezbûrân es-Seyyid el-Hâc Mehmed Emin Ağa ve es-Seyyid Mustafa’dan herbirine isâbeti tahakkukundan sonra mezbûrân es-Seyyid el-Hâc Mehmed Emin Ağa ve es-Seyyid Mustafa asâleten ve mu‘arrefetü’z-zât zevce-i mezbûre Havva Hatun kendi nefsinden asâleten ve sagīretân-ı mezbûretân Nesibe ve Emine’nin bâ-hüccet-i şer‘iye mansûbe vasîleri olmağla vesâyeten ve kebîretân-ı mezbûretân Hanife ve Hadice taraflarından ber-vech-i âtî vekîlleri olduğu karındaşları mezbûrân Mehmed Emin Ağa ve es-Seyyid Mustafa şehâdetleriyle sâbit olmağla vekâleten meclis-i ma‘kūd-ı mezkûrda karye-i mezbûre sâkinelerinden kezâlik zâtı mu‘arrefe Saliha bt. Hasan nâm hatun mahzarında mezbûre Saliha Hatun târih-i i‘lâmdan üç buçuk sene mukaddem mûrisimiz müteveffâ-yı mezbûr Ahmed Ağa yedinden istidâne ve kabz eylediği sekiz yüz on dört guruş deyni olup hattâ emlâkinden karye-i mezbûre kurbünde Modaburnu nâm mahâlde vâki‘ bir kıt‘a bağını vefâen bey‘ ve teslîm eylediğini ikrâr ve bir kıt‘a hüccet-i şer‘iye i‘tâ edip ve işbu târih-i i‘lâma gelince iki buçuk senelik meblağ-ı merkūm nemâsından iki yüz on guruş ki cem‘an bin yirmi dört guruşu kable’l-ahz ve’l-istifâ fevt olup bize mevrûs olmağla bi’l-verâse taleb ederiz deyü da‘vâ ve mezbûre Saliha Hatun cevâbında sekiz yüz on dört guruş deyni olduğunu ikrâr ve ziyâde iki yüz on guruşu bilâ-devr-i şer‘î murâbahadır deyü eylediği def‘ini ikrâr etmeleriyle iki yüz on guruş murâbaha da‘vâsı meşrû‘a olmamağla bî-vech mu‘ârazadan ba‘de’l-men‘ mezbûre Saliha’nın mertebe-i ikrârı olan sekiz yüz on dört guruşun altı yüz guruşunu nakden teslîm bâkī iki yüz on dört guruşu târih-i i‘lâmdan otuz beş gün tamamında edâ eylemek üzere ta‘ahhüd ve mukırre-i mezbûrenin oğlu hâzır bi’l-meclis el-Hâc Mehmed bi’l-emr ve’l-kabûl tekeffül ve bu vechile kat‘-ı münâza‘a eylediklerini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 13 min-Safer sene 1207.