Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 872 Hüküm no: 1474 Orijinal metin no: [123b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anber bt. Abdullah’ın vakıf menzilin devrinden alacağı olduğu iddiasıyla açtığı davada iddiasını ispat edemediği Ma‘rûz Medîne-i Üsküdar’da Debbâğlar mahallesinde sâkine Anber bt. Abdullah nâm Zenciye tarafından vekîl olduğu zât-ı mezbûreyi bi’l-mu‘arrefeti’ş-şer‘iye ârifân Hasan Ağa b. Ahmed ve diğer Hasan b. İbrahim nâm kimesneler şehâdetleriyle sâbit olan Mehmed Şükrü Ağa b. Mustafa nâm kimesne meclis-i şer‘-i hatîrde zâtı mu‘arrefe Halime bt. Mustafa nâm hatun mahzarında mezbûre Halime Hatun târih-i i‘lâmdan üç sene mukaddem mahalle-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzilini bâ-ma‘rifet-i mütevellî yüz kırk guruş bedel mukābilesinde müvekkilem mezbûreye mecmû‘unu ferâğ etmek üzere mukāvele ve meblağ-ı merkūm yüz kırk guruşu müvekkilem mezbûre yedinden ahz ü kabz etmişken müvekkilem mezbûrenin gıyâbında menzil-i mezkûrun nısfını müvekkilem mezbûreye ve nısf-ı âharını dahi işbu hâzıra bi’l-meclis Fatıma bt. Abdullah nâm Zenciyeye müvekkilem mezbûrenin icâzeti olmaksızın ferâğ etmekle müvekkilem mezbûreden ziyâde makbûzu olan yetmiş guruşu bi’l-vekâle taleb ederim deyü ba‘de’d-da‘vâ ve’l-istintâk ve’l-inkâr müdde‘î-i vekîl-i mezbûr ber-vech-i muharrer müdde‘âsını isbâta kādir olamayıp talebiyle mezbûre Halime Hatun gıbbe’t-tahlîfi’ş-şer‘î mûcibiyle müdde‘î-i vekîl-i mezbûr husûs-ı mezkûrda müvekkilesine izâfetle mezbûre Halime Hatun’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 24 min-M sene 1207.