Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 872 Hüküm no: 1475 Orijinal metin no: [123b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Seyyid Feyzullah’ın Ömer Beşe’ye olan borcunu doksan bir gün içerisinde ödemeye söz verdiği Ma‘rûz Medîne-i Üsküdar’da Hasanağa mahallesinde sâkin Ömer Beşe b. Mehmed nâm kimesne medîne-i mezbûrede mahfil-i Bâb’da meclis-i şer‘-i hatîrde Kahveci es-Seyyid Feyzullah b. es-Seyyid Ömer nâm kimesne mahzarında mezbûr es-Seyyid Feyzullah bin iki yüz beş senesi Muharremi’l-harâmı gurresinde yedimden istidâne ve kabz ve kendi umûruna sarfla istihlâk eylediği dört yüz guruş deyni mukābilesinde merhûm Kilisî Hüseyin Efendi Vakfı musakkafâtından olup mahalle-i mezbûrede vâki‘ ber-mûceb-i temessük taht-ı tasarrufunda olan bir bâb vakıf menzil ile yine mezbûr es-Seyyid Feyzullah mahalle-i mezbûrede vâki‘ mütevellîsi olduğu bir bâb âhar vakıf menzil ki cem‘an iki bâb menzillerini bana vefâen ferâğ ve teslîm eyledikden sonra ben dahi menzileyn-i mezkûreyni târih-i merkūmdan beher şehr tamamında beşer guruş ücret ile kendiye îcâr edip hattâ meblağ-ı merkūm bana deyni olup ber-vech-i muharrer beşer guruş ücret ile istîcârını ikrâr ve temessük i‘tâsından sonra asl-ı mâl-ı merkūm dört yüz guruşun yirmi guruşunu yedinden ahz bâkī üç yüz seksen guruş ve menzileyn-i mezkûreyn ücretinden bâkī yirmi üç guruş ki cem‘an dört yüz üç guruşu taleb ederim deyü da‘vâ ve mezbûr es-Seyyid Feyzullah cevâbında meblağ-ı merkūm üç yüz seksen guruş müdde‘î-i mezbûra deyni olduğunu ikrâr u i‘tirâf edip lâkin menzileyn-i mezkûreyni ber-vech-i muharrer istîcârını inkâr etmeğin müdde‘î-i mezbûr Ömer Beşe beher şehr beşer guruş ücret ile mezbûra îcâr ol dahi istîcârını beyân esnâsında bâ-tavassut-ı muslihîn müdde‘î-i merkūmun menzileyn-i mezkûreyn ücretinden matlûbu olan yirmi guruşun on üç guruşunu hat ve tenzîl ve menzileyn-i mezkûreyn ücretine müte‘allika âmme-i de‘âvîden mezbûr es-Seyyid Feyzullah’ın ve mezbûr es-Seyyid Feyzullah dahi ücretden ziyâde medfû‘âtına müetallika âmme-i de‘âvîden herbiri âharın zimmetini ba‘de’l-ibrâ ve’l-kabûl mezbûr es-Seyyid Feyzullah meblağ-ı merkūm üç yüz seksen guruş ile menzileyn-i mezkûreyn ücretinden mu‘terif olduğu on guruş ki cem‘an üç yüz doksan guruşun otuz guruşunu müdde‘î-i mezbûr Ömer Beşe’ye def‘ ü teslîm bâkī üç yüz altmış guruşu târih-i i‘lâmdan doksan bir gün tamamında müdde‘î-i mezbûra edâ ve teslîm eylemek üzere ta‘ahhüd eyledikde müdde‘î-i mezbûr Ömer Beşe dahi râzı olup bu vechile kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 20 min-Zilka‘de sene 1207.