Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 874 Hüküm no: 1477 Orijinal metin no: [123b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar ustası tarafından bir arada yakalananların mahalleden çıkarılmaları Ma‘rûz Medîne-i Üsküdar’da Solaksinan mahallesi ahâlisinden Ali Ağa b. Ali ve el-Hâc Ömer b. Ali ve Osman Beşe b. Ali ve diğer el-Hâc Ömer b. Ahmed ve Yusuf Beşe b. Mehmed ve Halil b. Mehmed ve es-Seyyid Halil b. Abdullah nâm kimesneler medîne-i mezbûrede mahfil-i Bâb’da meclis-i şer‘-i hatîrde herbiri takrîr-i kelâm ve ta‘bîr ani’l-merâm edip mahalle-i mezbûrede sâkine Selamet kızı demekle meşhûre gāibe ani’l-meclis Hadice bt. Mehmed nâm avrat kendi hâlinde ırzıyla mukayyede olmayıp nâ-mahrem kimesnelerden ictinâbı olmadığından mâ‘adâ dâimâ menziline mechûlü’l-ahvâl kimesneler duhûl ve hurûc edip bi’d-defa‘ât kendiye nush ü pend eylediğimizde mütenassıha olmayıp ef‘âl-i kabîhasında ısrâr ve hattâ târih-i i‘lâmdan iki gece mukaddem kendiye ecnebî olan el-Hâc Mehmed b. Abdullah ile menzilinde icrâ-yı fısk için cem‘ oldukları hâlde Üsküdar ustası ma‘rifetiyle ve ma‘rifet-i şer‘le ahz olunup ol-vechile mezbûre Hadice’den emn ü rahatımız meslûb olmuşdur deyü sû’-i hâlini ihbâr ve mahalle-i mezbûreden ihrâc olunmak bâbında fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 14 min-S sene 1207.