Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 874 Hüküm no: 1478 Orijinal metin no: [123b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doğramacı İbrahim tarafından bıçakla yaralandığını iddia eden Çukadar Ali’nin durumunun tahkiki Ma‘rûz Medîne-i Üsküdar’da Hasanağa mahallesinde sâkine Çukadâr Bostanî Ali b. Salih nâm kimesne meclis-i şer‘-i hatîrde takrîr-i kelâm edip hâzır bi’l-meclis Doğramacı İbrahim b. İbrahim nâm kimesne ile gāibân ani’l-meclis birinin ismi Mısırlı Mehmed Emin ve birinin ismi ma‘lûmum olmayan iki nefer refîkleri târih-i i‘lâm günü vakt-i mağribde medîne-i mezbûrede Mihrimah Câmii kurbünde münâza‘a esnâsında mezbûr İbrahim bi-gayrı hakkın hançer ile sol küreğim altından bir yerinden ve sol kolum bâzûsundan bir yerinden ki cem‘an iki mahâlden darb ve cerh ve gāibân-ı mezbûrân elleriyle darb etmeleriyle kıbel-i şer‘den keşf ve mu‘âyene olunmak matlûbumdur dedikde cerrâh tâifesinden el-Hâc Ali ve sâir mazbûtü’l-esâmî kimesneler ile a‘zâsına ba‘de’n-nazar fi’l-hakīka mezbûr Bostanî Ali küreği altından bir yerinden ve sol kolu bâzûsundan bir yerinden hançer yarasıyla mecrûh idiği ba‘de’l-keşf ve’l-mu‘âyene vâki‘ hâl bi’l-iltimâs huzûr-ı âlîlerine i‘lâm olundu. Fî 18 min-S sene 1207.