Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 875 Hüküm no: 1479 Orijinal metin no: [124a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa tarafından tüfekle yaralandığını iddia eden Seyyid Mehmed’in durumunun tahkiki Ma‘rûz Vilâyet-i Anadolu’da Şeyh Bizinli (Bizini) aşîretinden es-Seyyid Mehmed b. İsmail nâm kimesne medîne-i mezbûrede mahfil-i Bâb’da meclis-i şer‘-i hatîrde bast-ı kelâm ve ifâde-i merâm edip gāib ani’l-meclis Mustafa nâm kimesne târih-i i‘lâm gecesi ba‘de’l-ışâ medîne-i mezbûreye tâbi‘ Nerdubânlı karyesi kurbünde Uzunçayır nâm mahâlde bi-gayrı hakkın tüfenk kurşunuyla sağ kalça üzerinden darb ve cerh etmekle keşfolunmak matlûbumdur dedikde cerrâh tâifesinden el-Hâc Ali ve sâir mazbûtü’l-esâmî Müslimîn ile a‘zâsına nazar olundukda fi’l-hakīka mezbûr es-Seyyid [Mehmed’in] sağ kalçası üzerinden kurşun yarasıyla mecrûh olduğu lede’l-keşf ve’l-mu‘âyene zâhir olduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 19 min-S sene 1207.