Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 877 Hüküm no: 1486 Orijinal metin no: [124b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın mehrinin peşin kısmıya alakalı alacağı olduğu iddiasıyla açtığı davada sulh olduğu Ma‘rûz Medîne-i Üsküdar’da Kefçe mahallesinde sâkine mu‘arrefetü’z-zât sâhibe-i arzuhâl Emine bt. Abdullah meclis-i şer‘-i hatîrde zevc-i sâbıkı arzuhâlde ismi mezkûr Ömer b. İbrahim nâm kimesne mahzarında ben mezbûr Ömer’in yirmi beş guruş mehr-i müeccel tesmiyesiyle zevce-i medhûlün-bihâsı iken beni tatlîk etmekle mehr-i mezkûr yirmi beş guruş ile nafaka-i iddet-i ma‘lûmem için dahi bi’t-terâzî beş guruş ki cem‘an otuz guruş hakkımı ahz ü kabz edip lâkin hîn-i akdde iki minder ve bir şilde ve bir yorgan ve bir baş yasdığı ve dört sahan ve bir sini ve bir tencere ve bir şorba tası ve bir tâbe ve bir fincan tepsisi ve bir şamdan ve bir yüz yasdığını bana mu‘accel olmak üzere ikrâr etmekle taleb ederim deyü eylediği da‘vâsından bâ-tavassut-ı muslihîn yedi guruş bedel-i makbûza sulh olup husûs-ı mezkûra ve sâire müte‘allika âmme-i de‘âvîden mezbûr Ömer’in zimmetini ba‘de’l-ibrâ ve’l-kabûl kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 22 min-S sene 1207.