Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 878 Hüküm no: 1487 Orijinal metin no: [124b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Bostancı Ali’nin vârislerinin açtığı alacak davasında sulh olduğu Ma‘rûz Mevâdd-ı şer‘iye istimâ‘ı’çün bi’l-iltimâs kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’a tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûre kurbünde vâki‘ Kule Bağçesi Ocağı neferâtından iken bundan akdem fevt olan Bostanî Ali b. İbrahim b. Abdullah’ın li-ebeveyn er karındaşı ve hasren vârisi olduğu lede’ş-şer‘i’l-enver mütehakkık kolan Bostanî İsmail Beşe b. el-mezbûr İbrahim nâm kimesne meclis-i ma‘kūd-ı mezkûrda müteveffâ-yı mezbûrun medyûnu Palaş v. Kostanti nâm zimmî muvâcehesinde bin iki yüz iki senesi Şevvâli’nin yirmi üçüncü günü târihiyle müverrah işbu yedimde olan bir kıt‘a temessük nâtık olduğu üzere karındaşım müteveffâ-yı mezbûr yedinden istidâne ve kabz eylediği dört yüz on dört guruşu kable’l-ahz ve’l-istifâ fevt olup bana mevrûs olmağla ben dahi bi’l-verâse taleb ve da‘vâya mübâşeret eylediğimde bâ-tavassut-ı muslihîn iki yüz on iki guruş mukābilesinde merkūm Palaş zimmî ile sulh eylediklerinde ziyâde müdde‘âm olan iki yüz guruşa ve bi’l-cümle husûs-ı merkūma müte‘allika âmme-i de‘âvîden herbirimiz âharın zimmetini ba‘de’l-ibrâ ve’l-kabûl bedel-i sulh-ı merkūm iki yüz on iki guruşu târih-i i‘lâmdan sekiz gün tamamında müdde‘î-i mezbûr İsmail Beşe’ye edâ ve teslîme merkūm Palaş zimmî ta‘ahhüdünü tasdîk eylediğini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 20 min-Safer sene 1207.