Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 878 Hüküm no: 1488 Orijinal metin no: [124b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahalleli tarafından uygunsuz hallerinden şikâyet edilen Hibetullah ve oğullarının oturdukları mahalleden çıkarılmaları Ma‘rûz Medîne-i Üsküdar’da Solaksinan mahallesi imâmı Hafız Mustafa Efendi b. el-Hâc Mustafa ve Müezzin es-Seyyid Molla Bekir b. Mustafa ve İsmail Beşe b. Osman Beşe ve el-Hâc Hafız Mehmed Tâhir Efendi b. Osman ve Ahmed Beşe b. Mustafa ve es-Seyyid Ali b. es-Seyyid Mehmed ve Hafız Mehmed Emin Ağa b. İbrahim ve Ali Ağa b. el-Hâc Hüseyin ve Mustafa Beşe b. Osman ve es-Seyyid Ahmed Ağa b. Ahmed ve es-Seyyid Mehmed b. Ahmed nâm kimesneler medîne-i mezbûrede mahfil-i Bâb’da meclis-i şer‘-i hatîrde yine mahalle-i mezbûrede sâkine mu‘arrefetü’z-zât Hibetullah bt. Abdullah nâm hatun mahzarında mezbûre Hibetullah Hatun ve oğulları Mehmed ve İsmail kendi hâllerinde ırzlarıyla mukayyedler olmayıp dâimâ bizlere bi’l-muvâcehe mûcib-i ta‘zîr olur elfâz-ı kabîha ile şetm ve hetk-i ırz etmeleriyle bi’d-defa‘ât kendülere nush ü pend eylediğimizde mütenassıhlar olmayıp âdet-i melûfelerinde ısrâr eylediklerine binâen hattâ târih-i i‘lâm günü ve üç gün mukaddem mahalle-i mezbûrede sâkin hâzır bi’l-meclis es-Seyyid eş-Şeyh Mustafa Necib Efendi b. Ali nâm kimesneye dahi yine mezbûre Hibetullah Hatun bi’l-muvâcehe mûcib-i ta‘zîr olur elfâz-ı kabîha ile şetm ve hetk-i ırz etmekle mezbûrûndan bi’l-külliye emniyetimiz meslûb olmuşdur deyü mezbûre Hibetullah Hatun’un ber-vech-i muharrer sû’-i hâlini ahâli-i mezbûrûndan herbiri muvâcehesinde ihbâr ve fîmâ-ba‘d mezbûre Hibetullah Hatun ve oğulları mezbûrân Mehmed ve İsmail’den herbirleri mahalle-i mezbûreden ihrâc olunmaları bâbında fermân-ı âlîleri sudûrunu ahâli-i mezbûrûndan herbirler istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 25 min-S sene 1207.