Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 880 Hüküm no: 1490 Orijinal metin no: [124b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamam çalışanları ve komşuları tarafından şikâyet edilen Büyük Hamam’ın işletmecisi Ayşe’nin ay sonunda ayrılmaya söz verdiği Ma‘rûz Medîne-i Üsküdar’da vâki‘ Büyük Hamam dellâkelerinden zâtları mu‘arrefe Hadice bt. İsmail ve diğer Hadice bt. Abdullah ve diğer Hadice bt. Mustafa ve Râziye bt. Ömer ve Âişe bt. Ahmed ve Fatıma bt. Süleyman ve diğer Âişe bt. Ebûbekir ve Emine bt. Mehmed ve Zeyneb bt. Halil ve Nefîse bt. Abdullah nâm hatunlar ile hamam-ı mezkûr kurbünde menzilleri olan el-Hâc İbrahim Ağa b. Davud ve es-Seyyid Abdurrahman b. es-Seyyid el-Hâc Abdullah ve Süleyman Ağa b. Mehmed ve Osman Ağa b. Yusuf nâm kimesneler medîne-i mezbûrede mahfil-i Bâb’da meclis-i şer‘-i hatîrde mu‘arrefetü’z-zât Hammâmî Âişe bt. Süleyman nâm hatun mahzarında mezbûre Hammâmî Âişe Hatun hadîdetü’l-lisân olup dâimâ dellâke-i mezbûrân muvâcehelerinde mûcib-i ta‘zîr olur elfâz-ı kabîha ile şetm ve hetk-i ırz eylediğinden mâ‘adâ müşterilerin bahşiş nâmıyla i‘tâ eyledikleri meblağı yedlerinden ahz ve mezbûrûnun zevcelerinden dahi ziyâde ücret mutâlebesiyle rencîde edip bi’d-defa‘ât kendiye nush ü pend olundukda mütenassıha ve mütenebbihe olmayıp ef‘âl-i sâbıkāsında ısrâr etmekle rahatımız meslûb olmuşdur deyü muvâcehesinde iştikâ ve hamam-ı mezkûrdan ihrâcını istid‘â eylediklerinde mezbûre Hammâmî Âişe Hatun dahi târih-i i‘lâm şehri gāyetinde fesh-i icâre birle hurûca ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-Safer sene 1207.