Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 881 Hüküm no: 1493 Orijinal metin no: [125a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecnun Saraylı Hamlacıoğlu Mehmed Ağa’nın Çengelköyü’ndeki akar çeşme vakfına altmış beş kuruş borcu olduğu Ma‘rûz Mevâdd-ı şer‘iye istimâ‘ı’çün bi’l-iltimâs kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’a tâbi‘ Çenger karyesine varup mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûrede vâki‘ mâ-i cârî çeşme mühimmâtı’çün mevkūfe nukūdun mütevellîsi Ali Beşe b. Mustafa nâm kimesne meclis-i ma‘kūd-ı mezkûrda karye-i mezbûre sükkânından Sarayî Hamlacıoğlu Mehmed Ağa b. Halil nâm mecnûnun kıbel-i şer‘den bâ-hüccet-i şer‘iye mansûb vasîsi İmâm Süleyman Efendi b. Abdullah mahzarında bin iki yüz üç senesi Cumâdelâhire’nin on üçüncü günü târihiyle müverrah işbu yedimde olan bir kıt‘a hüccet-i şer‘iye nâtıka olduğu üzere mâl-ı vakf-ı mezbûrdan bundan akdem mütevellîsi olan İsmail Ağa b. Ahmed yedinden mecnûn-ı mezbûr kemâl-i akl ve sıhhatinde istidâne ve kabz ve kendi umûruna sarfla istihlâk eylediği yüz guruş deyni mukābilesinde emlâkinden olup karye-i mezbûrede kâin bir bâb mülk menzilini bi-tarîki’l-istiğlâl bey‘ ve teslîm eyledikden sonra meblağ-ı merkūmun otuz beş guruşunu yedinden ahz ü kabz edip bâkī altmış beş guruşu mecnûn-ı mezbûr zimmetinde kalmağla vasî-i mezbûr Süleyman Efendi’ye teslîme tenbîh olunmak bi’t-tevliye matlûbumdur deyü ba‘de’d-da‘vâ ve’l-istintâk ve’l-inkâr müdde‘î-i mütevellî-i mezbûr ber-vech-i muharrer müdde‘âsını udûlden es-Seyyid el-Hâc Mehmed Said Efendi b. es-Seyyid el-Hâc Halil ve Uzun Ahmed Ağa b. el-Hâc Osman nâm kimesneler şehâdetleriyle vech-i şer‘î üzere muvâcehe-i mezbûr muvâcehesinde isbât etmeğin mûcibiyle meblağ-ı bâkī-i merkūm altmış beş guruşu müdde‘î-i mütevellî-i mezbûr Ali Beşe’ye teslîme vasî-i mezbûr Süleyman Efendi’ye şer‘an tenbîh eylediğini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlilerine i‘lâm olundu. Fî 27 min-S sene 1207.