Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 882 Hüküm no: 1496 Orijinal metin no: [125a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali Yazıcı’nın üzüm bedelinden alacağı olduğu iddiasıyla açtığı davada sulh olduğu Ma‘rûz Mahmiye-i İslâmbol’da Bal Kapanı tüccârından es-Seyyid Ali Yazıcı b. el-Hâc Ali medîne-i Üsküdar’da mahfil-i Bâb’da meclis-i şer‘-i hatîrde Osman b. Salih mahzarında mezbûr Osman târih-i i‘lâmdan bir ay mukaddem yedimden iştirâ ve kabz eylediği vezn ve fiyâtı beynimizde ma‘lûm üzüm semeninden yüz yirmi guruş hakkımın yirmi guruşunu yedinden ahz ve yüz guruşu zimmetinde bâkī kalıp hattâ meblağ-ı merkūm yüz guruş bana deyni olduğunu nâtık yedime bir kıt‘a temessük dahi i‘tâ etmekle taleb ederim deyü müdde‘î-i mezbûr ber-vech-i muharrer eylediği da‘vâsından bâ-tavassut-ı muslihîn doksan guruş bedel mukābilesinde sulh olup ziyâde müdde‘âsı olan on guruşa müte‘allika âmme-i de‘âvîden mezbûr Osman’ın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 29 min-S sene 1207.