Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 883 Hüküm no: 1497 Orijinal metin no: [125b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Paşa’nın Aşçıbaşı Ahmed’in alacağı olduğu iddiasıyla açtığı davada iddiasını ispat edemediği Ma‘rûz Vilâyet-i Anadolu’da Anapa Kal‘ası’nda sâkin Mustafa Paşa’nın aşçıbaşısı Ahmed b. Yusuf tarafından ber-vech-i âtî vekîli olduğu Abdurrahman b. Osman ve Hüseyin b. İsmail nâm kimesneler şehâdetleriyle sâbit olan Kalyoncu Mehmed b. Mahmud medîne-i mezbûrede mahfil-i Bâb’da meclis-i şer‘-i hatîrde Mehmed Ağa b. Hüseyin mahzarında müvekkilim mezbûr Ahmed bundan akdem Anapa’ya gider iken ma‘an gitmek için Sivaslı Mehmed nâm kimesneye elli guruş teslîm edip mezbûr Mehmed müvekkilim mezbûr ile gitmeyip firâr etmekle mezbûr Mehmed Ağa müvekkilimin emriyle meblağ-ı merkūm elli guruşu mezbûr Sivaslı Mehmed’den ahz etmekle müvekkilim mezbûra irsâl etmeyip zimmetinde kalmağla bi’l-vekâle taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyâna kādir olamayıp talebiyle mezbûr Mehmed Ağa gıbbe’t-tahlîfi’ş-şer‘î mûcibiyle müdde‘î-i vekîl-i mezbûr husûs-ı mezkûrda mezbûr Mehmed Ağa’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 2 min-Ra sene 1207.