Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 883 Hüküm no: 1498 Orijinal metin no: [125b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmek fırını kiracısı Seyyid Hacı İbrahim’in fırının mutasarrıfları Haseki Ahmed Ağa ve Artin ile sulh olduğu Ma‘rûz Medîne-i Üsküdar’da Atpazarı dâhilinde habbâz fırınının müsteciri es-Seyyid el-Hâc İbrahim b. el-Hâc Abdurrahman nâm kimesne medîne-i mezbûrede mahfil-i Bâb’da meclis-i şer‘-i hatîrde fırın-ı mezkûrun bi’l-icâreteyn mutasarrıfları Haseki Ahmed Ağa b. İbrahim nâm kimesne ile Artin v. Hıristo nâm zimmî muvâcehelerinde mezbûrân Ahmed Ağa ve Artin târih-i i‘lâmdan beş ay mukaddem fırın-ı mezkûru beher şehr yedişer guruş ücret ile bana îcâr ben dahi istîcâr ve fırın-ı mezkûru gedik olmak üzere beş yüz guruşa bana bey‘ ve temlik ve semen-i mezkûr beş yüz guruş ile fırın-ı mezkûrun muktezî olan mahallerini ben müceddeden ta‘mîr ve termîme ta‘ahhüd ba‘de fırın-ı mezkûrun külhanına ve sâir mahallerine yüz altmış guruş masrûfum olmağla bey‘-i mezkûrun fesâdına binâen zikr olunan gediği red ve masrûfum olan meblağ-ı merkūm yüz altmış guruşu taleb ederim deyü da‘vâ ve vukū‘ı’l-münâza‘a bâ-tavassut-ı muslihîn mezbûrân Ahmed Ağa ve Artin zimmînin benden müdde‘âları olan fırın-ı mezkûr ücretinden otuz beş guruş üzerine on guruş zammıyla ben cem‘an kırk beş guruş üzerine sulh eylediklerinde ben dahi sulh-ı merkūmu kabûl ve zikr olunan gediği kendilere kemâ-fi’s-sâbık redd ü teslîm ve ziyâde müdde‘âm olan yüz on beş guruşa ve gedik da‘vâsına ve ibtidâ-yı akdden işbu târih-i kitâba gelince beynimizde cereyân eden cemî‘-i ahz ü i‘tâ ve mu‘âmelât-ı şettâya ve hukūk-ı sâireye müte‘allika âmme-i de‘âvîden herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik deyü müdde‘î-i mezbûrun bi’l-cümle takrîr-i meşrûhunu mezbûrân Ahmed Ağa ve Artin zimmî vicâhen ve şifâhen tahkīk ve tasdîk ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 25 min-S sene 1207.