Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 884 Hüküm no: 1499 Orijinal metin no: [125b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Karabaş’ın Arnavutköy’de satın aldığı evde açmak istediği bakkal dükkânı ile şerbethaneden ahalinin şikâyeti üzerine vazgeçtiği Ma‘rûz Bi’l-iltimâs kıbel-i şer‘-i şerîfden meb‘ûs Ali Efendi dâ‘îleri medîne-i Üsküdar’a muzâfe Yoros nâhiyesine tâbi‘ Arnabud karyesine varıp mazbûtü’l-esâmî Müslimîn huzûrlarında akd-i meclis-i şer‘-i nebevî etdikde karye-i mezbûre mütemekkinlerinden Bağçevân Marko v. Vasil ve Ağapo v. Yorgi ve Anaştaş v. Koço ve Kostanti [v.] Zelyo ve Tano v. Anaştaş ve Anaştaş v. Yorgi ve Yorgi v. Tanaş ve diğer Yorgi v. Yani nâm zimmîler meclis-i ma‘kūd-ı mezkûrda yine karye-i mezbûrede mütemekkin Yani v. Karabaş Dimitri nâm zimmî muvâcehesinde karye-i mezbûrede cümlenin re’y ve ma‘rifetiyle bir bakkāl dükkânı olup rahîs bahâ ile ibâdullâha emti‘a-i bakkālı bey‘ ederken bu esnâda merkūm Yani zimmî kendi mütemekkin olmak için gāib ani’l-meclis Yanaki v. Dimitri zimmîden iştirâ eylediği karye-i mezbûrede vâki‘ menzilde kendi mütemekkin olmadığından mâ‘adâ menzil-i mezkûru şerbethâne ve bakkāl dükkânı yapmak irâdesinde olup bakkāl dükkânı cümlenin re’y ve ma‘rifetine müfevvaz ve şerbethânenin dahi ihdâsı memnû‘âtdan olduğundan gayrı fesâda müeddî olacağı zâhir ve nümâyân ve merkūm Yani zimmî cümlemizin nizâmımıza muhâlif bakkāl dükkânı ve memnû‘âtdan olan şerbethâne vaz‘ını murâd eder deyü herbiri muvâcehesinde ihbâr ve merkūm Yani zimmî fîmâ-ba‘d menzil-i mezkûrda kendi mütemekkin olup bakkāl dükkânı ve şerbethâne inşâ etmemek üzere müte‘ahhid ve bu vechile kat‘-ı nizâ‘ eylediklerini mezbûr dâ‘îleri mahâllinde ba‘de’t-tahrîr ve’l-inhâ bi’l-iltimâs huzûr-ı âlîlerine i‘lâm olundu. Fî 25 min-S sene 1207.