Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 886 Hüküm no: 1502 Orijinal metin no: [125b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Ömer’in oğlu Mustafa’yı eski karısı Emine’ye teslim ettiği Ma‘rûz Medîne-i Üsküdar’da Evliyâhoca mahallesinde sâkine mu‘arrefetü’z-zât Emine bt. Abdullah nâm hatun mahfil-i Bâb’da meclis-i şer‘-i hatîrde zevc-i sâbıkı Kahveci Ömer b. İbrahim mahzarında mezbûr Ömer’in firâşından hâsıl ve benden mütevellî sadrî oğlum Mustafa külle yevmin ikişer para nafaka takdîriyle bi-hakkı’l-hıdâne hacr ve terbiyemde iken ben bundan akdem bi’r-rızâ sagīr-i mezbûru babası mezbûra teslîm etmişdim hâlâ mezbûr yine sagīr-i mezbûru bana teslîm eyledikde ben dahi yedinden ahz edip sagīr-i mezbûrun nafakası için babası mezbûrdan bir nesne mutâlebe etmeyip kendi mâlımdan infâk ve iksâya ta‘ahhüd eyledim deyü takrîrini mezbûr Ömer tasdîk eylediği bi’l-iltimâs huzûr-ı âlîlerine i‘lâm olundu. Fî 27 min-S sene 1207.