Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 886 Hüküm no: 1503 Orijinal metin no: [126a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’daki bahçıvanlar tarafından Bostancı Rüstem’in işlerine karışmaması için ferman çıkarılmasını istedikleri Ma‘rûz Medîne-i Üsküdar’da vâki‘ bağçevân tâifesinden kethudâları Abdullah Beşe b. Osman ve Ali b. Osman ve Hüseyin b. Osman ve İsmail b. Hasan ve Ali b. Halil ve diğer Hüseyin b. Osman ve İbrahim b. Osman nâm kimesneler ile zimmî ustalarından İstefan v.- Roko ve Angeli v. Kirkor ve diğer Angeli v. Hıristo ve Dimitri v. Petro ve Hıristo v. Yuvan ve Lazyo v. Metro ve İstefan v. Yorgi ve Kosta v. Metro ve Anaştaş v. Çelo ve Liba v. Petro ve Metro v. Angeli nâm zimmîler medîne-i mezbûrede mahfil-i Bâb’da meclis-i şer‘-i hatîrde Bostanî Rüstem b. Süleyman nâm kimesne mahzarında mezbûr Bostanî Rüstem’in Kādı karyesinde vâki‘ bir kıt‘a sebze bostanı olmak takrîbiyle umûr-ı esnâfı rü’yet irâdesiyle esnâf-ı mezkûreyi fesâd ve nizâm-ı kadîmimizin ihtilâline bâdî ve bi’d-defa‘ât kendiye nush ü pend olundukda mütenassıh olmayıp ef‘âl-ı sâbıkāsında ısrâr etmekle hâb u rahatımız külliyen meslûb olmuşdur deyü muvâcehesinde teşekkî ve mezbûr Bostanî Rüstem’in zâbiti ma‘rifetiyle ta‘zîr ve tedîb ve fîmâ-ba‘d umûr-ı esnâf-ı mezkûreye müdâhale etmemek üzere fermân-ı âlîleri sudûrunu istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 3 min-Ra sene 1207.