Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 887 Hüküm no: 1505 Orijinal metin no: [126a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Ali’nin satın aldığı bostan mahsûlünden ettiği zararı karşılaması talebiyle İbrahim Beşe aleyhine açtığı davada sulh olduğu Ma‘rûz Mevâdd-ı şer‘iye istimâ‘ı’çün bi’l-iltimâs kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’a tâbi‘ Kādı karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûrede sâkin Osman b. Ali nâm kimesne meclis-i ma‘kūd-ı mezkûrda İbrahim Beşe b. İsa nâm kimesne mahzarında târih-i i‘lâmdan iki ay mukaddem mezbûr İbrahim Beşe karye-i mezbûre hâricinde Modaburnu nâm mahâlde vâki‘ bağının üzüm ve kavun ve karpuz mahsûlünü üç yüz beş guruşa mücâzefeten bana bey‘ ben dahi ba‘de’l-iştirâ âhara bey‘le istihlâk eylediğimde doksan guruş zarar etmemle meblağ-ı merkūm doksan guruşu taleb ederim deyü tasaddî eylediği da‘vâsından bâ-tavassut-ı muslihîn yirmi guruş bedel-i makbûz mukābilesinde mezbûr İbrahim Beşe ile sulh olup ziyâde mutâlebesine ve bi’l-cümle husûs-ı merkūma müte‘allika âmme-i de‘âvîden herbiri âharın zimmetini ba‘de’l-ibrâ ve’l-kabûl kat‘-ı münâza‘a eylediklerini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 5 min-Ra sene 1207.