Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 887 Hüküm no: 1506 Orijinal metin no: [126a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiragos v. Melkon’un tasarrufunda bulunan vakıf evini kendisine bedeli karşılığında devretmeyi reddeden Mimi v. Todoş’a açtığı davasının muteber olmadığı Ma‘rûz Mevâdd-ı şer‘iye istimâ‘ı’çün bi’l-iltimâs kıbel-i şer‘-i şerîfden meb‘ûs Mehmed Esad Efendi dâ‘îleri medîne-i Üsküdar’a tâbi‘ Kādı karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûre mütemekkinlerinden Kiragos v. Melkon nâm zimmî meclis-i ma‘kūd-ı mezkûrda Mimi v. Todoş nâm zimmî muvâcehesinde merkūm Mimi zimmî karye-i mezbûrede vâki‘ merhûm Kara Mehmed Paşa Vakfı musakkafâtından ber-mûceb-i temessük mutasarrıf olduğu bir bâb menzili dört yüz guruş bedel vermek üzere ferâğ ve tefvîzini va‘ad etmekle ben dahi gāib ani’l-meclis Abraham Kalfa için tefevvüz ve tarafından vekâleten meblağ-ı merkūm dört yüz guruşu merkūm Mimi zimmîye teslîm edip lâkin merkūm Mimi menzil-i mezkûru tefvîzden imtinâ‘ etmekle cebr ve tenbîh olunmak matlûbumdur deyü tasaddî eylediği da‘vâ-yı gayr-ı meşrû‘asına iltifât olunmayıp merkūm Kiragos zimmîyi bî-vech mu‘ârazadan men‘ eylediklerini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 5 min-Ra sene 1207.