Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 889 Hüküm no: 1509 Orijinal metin no: [126b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Osman’ın Yoros nahiyesine bağlı Hüseyinli köyündeki tarlasına Emine bt. Ahmed’in haksız yere müdahalesinin meni Ma‘rûz Medîne-i Üsküdar’da muzâfe Yoros nâhiyesine tâbi‘ Hüseyinli karyesi sâkinelerinden Şerife Fatıma nâm-ı diğer Emetullah bt. Osman nâm hatun tarafından ber-vech-i âtî vekîl olduğu zât-ı mezbûreyi bi’l-mu‘arrefeti’ş-şer‘iye ârifân Süleyman b. Halil ve Mehmed b. Mustafa nâm kimesneler şehâdetleriyle sâbit olan hâlâ zevci es-Seyyid Ali b. Mehmed medîne-i mezbûrede mahfil-i Bâb’da meclis-i şer‘-i hatîrde zikri âtî tarlanın sipâhîsi Mehmed Ağa’nın vekîli İsmail Ağa b. Mehmed hâzır olduğu hâlde mu‘arrefetü’z-zât Emine bt. Ahmed nâm hatun muvâcehesinde karye-i mezbûrede Hisâr toprağında vâki‘ bir tarafdan Keleş Mehmed tarlası ve bir tarafdan Emrullah ve Memiş ve Mehmed’in harman yerleri ve bir tarafdan çalılık ile mahdûd tahmînen beş keyl tohum isti‘âb eder bir kıt‘a tarlanın nısfı mezbûre Emine’nin ve nısf-ı âharı müvekkilem mezbûre Emetullah Hatun’un babası mezbûr Osman’ın ile’l-vefât taht-ı tasarrufunda olup ba‘de vefâtihî oğlu diğer Osman’a bilâ-tapu intikāl ve ba‘dehû mezbûr diğer Osman bilâ-veled vefât edip yurdu üzerinde sâkineler kız karındaşları müvekkilem mezbûre Emetullah ile Ümmügülsüm nâm hatuna ber-vech-i münâsafe tapu ile intikāl ve ba‘dehû mezbûre Ümmügülsüm bilâ-veled müteveffiye olup zikr olunan tarlanın [rub‘unu] dahi müvekkilem mezbûra tapu ile tapulayıp ol-vechile nısf tarlaya mutasarrıf iken mezbûre Emine Hatun mutasarrıfe olduğu hissesine kanâ‘at etmeyip müvekkilem mezbûrenin zirâ‘at ve hırâsetine bi-gayrı hakkın dahl ü ta‘arruz etmekle bundan akdem Yoros kazâsı nâibi Yakub Efendi huzûrunda mezbûre Emine ile bi’l-vekâle lede’l-mürâfa‘a mezbûre Emine mecmû‘-ı tarla benim olup bi-hakkın zirâ‘at ederim deyü bilâ-sened da‘vâya tasaddî ve istikşâf-i hâl için karye-i mezbûre sükkânından ma‘lûmü’l-esâmî Müslimîn ile kıbel-i şer‘den mahâlline varılıp suâl olundukda nısf-ı tarla müvekkilem mezbûrenin taht-ı tasarrufunda olduğunu sipâhî-i merkūm huzûrunda bi’ş-şöhret ve’t-tevâtür ihbâr ve mezbûre Emine’nin bilâ-sened nısf tarlaya mu‘ârazası men‘ olunmuşken tekrar müvekkilem mezbûrenin zirâ‘at ve hırâsetine müdâhale ve ta‘arruz etmekle suâl olunup dahl [ü] ta‘arruzu men‘ ü def‘ olunmak bi’l-vekâle matlûbumdur deyü takrîrine mutâbık ve nâib-i mûmâ-ileyhin hâtemiyle mahtûm bir kıt‘a i‘lâm-ı şer‘î ibrâzıyla ba‘de’d-da‘vâ ve’l-istintâk ve’l-inkâr müdde‘î-i vekîl-i mezbûr ber-vech-i muharrer müdde‘âsını ve mazmûn-ı i‘lâmı lede’t-tezkiye adâletleri zâhir olan karye-i mezbûre sâkinlerinden Süleyman b. Halil ve Mehmed b. Mustafa nâm kimesneler şehâdetleriyle ber-nehc-i şer‘î muvâcehesinde isbât etmeğin mûcibiyle mezbûre Emine nısf-ı tarlaya bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 21 min-S sene 1207.