Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 890 Hüküm no: 1510 Orijinal metin no: [126b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in ipçilik sanatını öğrenmek için İpçi İbrahim Usta’nın yanına verdiği küçük oğlu Ali için ücret talebinde bulunamayacağı Ma‘rûz Medîne-i Üsküdar’da misâfiren sâkin Hüseyin b. Mehmed medîne-i mezbûrede mahfil-i Bâb’da meclis-i şer‘-i hatîrde İpci İbrahim Usta b. el-Hâc Mehmed muvâcehesinde işbu hâzır bi’l-meclis oğlum Ali nâm sagīri vâlidesi gāibe ani’l-meclis Fatıma bt. Hasan nâm hatun târih-i i‘lâmdan yedi sene mukaddem ipçilik san‘atını ta‘lîm için mezbûr İbrahim Usta’ya verip ol dahi san‘at-i mezkûreyi sagīr-i mezbûreye ta‘lîm esnâsında sagīr-i mezbûr dahi san‘at-ı mezkûreye müte‘allika umûrda ber-vech-i mu‘tâd mezbûr İbrahim Usta’ya hizmet etmekle ol dahi sagīr-i mezbûru infâk ve iksâ edip lâkin sinîn-i mezkûrede sebkat eden hizmetinin ecr-i misli ile oğlum sagīr-i mezbûru bana teslîme mezbûr İbrahim Usta’ya tenbîh olunmak bi’l-velâye matlûbumdur deyü da‘vâ ol dahi cevâbında ber-vech-i muharrer sagīr-i mezbûr ipçilik san‘atını ta‘lîm esnâsında san‘at-i mezkûreye müte‘allika umûrda ber-vech-i mu‘tâd kendiye hizmet eylediğini ikrâr lâkin san‘at-i mezkûrede şâkird ve ustaya ücret-i hizmet etmek örf-i belde ve âdet değildir deyü iddi‘â ve teveccüh-i husûmet için san‘at-ı mezkûre ustalarından işbu hâzırân bi’l-meclis Abdullah Usta b. Ali ve Osman Usta b. el-Hâc Mehmed nâm kimesnelerden suâl olundukda fi’l-hakīka san‘at-i mezkûrede usta şâkirde ücret vermek örf-i belde ve mu‘tâd olmamışdır deyü herbiri alâ tarîki’ş-şehâde haber vermeleriyle mûcibiyle müdde‘î-i mezbûr husûs-ı mezkûrda ecr-i misl da‘vâsıyla mezbûr İbrahim Usta’ya bî-vech-i şer‘î mu‘ârazadan ba‘de’l-men‘ müdde‘î-i mezbûr Hüseyin oğlu sagīr-i mezbûru bi’r-rızâ meclis-i şer‘de ustası mezbûr İbrahim yanında terk ol dahi ipçilik san‘atını sagīr-i mezbûra ta‘lîm etmeğe taahhüd eylediği bi’l-iltimâs huzûr-ı âlîlerine i‘lâm olundu. Fî 23 min-S sene 1207.