Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 890 Hüküm no: 1511 Orijinal metin no: [126b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bulgurlu Köyü Subaşısı Ali’nin kireç fırını işleten Aci Karabet’ten ağalık adıyla veya çalı öşrü namıyla herhangi bir ücret almaya hakkının olmadığı Ma‘rûz Medîne-i Üsküdar’a tâbi‘ Bulgurlu karyesi subaşısı Ali b. Ahmed medîne-i mezbûrede mahfil-i Bâb’da meclis-i şer‘-i hatîrde Aci Karabet v. Sayıcı nâm zimmî muvâcehesinde işbu sene-i mübârekede deruhde ve iltizâmda olan karye-i mezbûre hudûdu dâhilinde vâki‘ Çalılık ta‘bîr olunur üç kıt‘a tarla derûnunda kireç hark olunan dört aded kireç fırını merkūm Karabet zimmînin tasarrufunda olup kadîmî mukāta‘a-i ma‘lûmesi edâ olundukdan sonra mukāta‘a-i mezkûreden mâ‘adâ zikr olunan kireç fırınları için sâbık subaşıda ağalık nâmıyla beher ocak hark olundukda yirmişer guruş verilegelmekle altı def‘ada hark eylediği ocaklardan yüz yirmi guruş ile hudûd-ı mezkûr dâhilinde kimesnenin taht-ı tasarrufunda olmayan mer‘adan kat‘ ve ahz eylediği çalı ile altı def‘ fırın hark etmekle zikr olunan çalının a‘şârını taleb ederim deyü da‘vâ ve merkūm Karabet zimmî cevâbında işbu yedimde olan bin iki yüz altı senesi Ramazani’l-mübârek’in yedini günü târihiyle müverrah bir kıt‘a i‘lâm-ı şer‘î nâtık olduğu üzere müdde‘î-i mezbûr Ali’nin babası müteveffâ-yı Ahmed subaşı iken medîne-i mezbûre mahkemesinde benden ağalık nâmıyla seksen guruş mutâlebe ve da‘vâsına iltifât olunmayıp bî-vech mu‘ârazadan men‘ olunmuşdum deyü takrîr-i meşrûhuna mutâbık bir kıt‘a i‘lâm ibrâzıyla müdde-i mezbûr ber-vech-i muharrer mazmûn-ı i‘lâmı ikrâr u i‘tirâf edip merkūm Karabet zimmî kemâ-fi’s-sâbık bî-vech- mu‘ârazadan ba‘de’l-men‘ merkūm Karabet zimmî zikr olunan mer‘adan çalı kat‘ını bi’l-külliye inkârından mâ‘adâ müdde‘î-i mezbûr ber-vech-i muharrer kat‘ olunan çalının mikdârını ve kıymetini ve kat‘ olunduğu mahâlli ta‘yîn ve tashîh-i da‘vâ edememekle müdde‘î-i mezbûr husûs-ı mezkûrda merkūm Karabet zimmîye bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî ( ) min-Ra sene 1207.