Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 893 Hüküm no: 1516 Orijinal metin no: [127a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Osman’ın üzüm bedelinden alacağı iddiasını ispat edemediği Ma‘rûz Medîne-i Üsküdar’da Reis mahallesinde sâkin Ahmed b. Osman mahfil-i Bâb’da meclis-i şer‘-i hatîrde Serkiz v. Manas zimmî muvâcehesinde merkūm Serkiz zimmî târih-i i‘lâmdan üç sene mukaddem yedimden iştirâ ve kabz eylediği vezn ve fiyâtı beynimizde ma‘lûm üzüm semeninden yirmi beş guruş hakkımın on beş guruşun yedinden ahz ü istifâ ve on guruşu zimmetinde bâkī kalmağla taleb ederim deyü da‘vâ merkūm Serkiz cevâbında müdde‘î-i mezbûrdan ancak on beş guruşluk üzüm iştirâsını ikrâr ziyâde on guruşu inkâr etmeğin müdde‘î-i mezbûr ber-vech-i muharrer müdde‘âsını beyâna kādir olamayıp talebiyle merkūm Serkiz zimmî gıbbe’t-tahlîfi’ş-şer‘î mûcibiyle müdde‘î-i mezbûr husûs-ı mezkûrda merkūm Serkiz zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-Ra sene 1207.