Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 893 Hüküm no: 1517 Orijinal metin no: [127a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Münadi Osman Ağa’nın oturduğu evin kira bedeli olarak Şeyh Mahmud Efendi Vakfı’na borcu olduğu Ma‘rûz Medîne-i Üsküdar’da vâki‘ merhûm Hüdâyî-i Aziz es-Seyyid eş-Şeyh Mahmud Efendi Vakfı’nın kāimmakām-ı mütevellisi Hafız Ali Efendi b. el-Hâc Mustafa medîne-i mezbûrede mahfil-i Bâb’da meclis-i şer‘-i hatîrde Münâdî Osman Ağa b. Mehmed mahzarında mezbûr Osman Ağa bin iki yüz bir senesi Cumâdelûlâ’nın on altıncı günü vakf-ı mezbûrdan olmak üzere yedimden bi-tarîki’l-karz istidâne ve kabz eylediği sekiz yüz guruş deyni mukābilesinde medîne-i mezbûrede Yenimahalle’de vâki‘ bir bâb mülk menzilini vakf-ı mezbûra istiğlalen bey‘ eyledikden sonra yine menzil-i mezkûru beher sene tamamında yüz yirmişer guruşdan üç sene tamamına dek cem‘an üç yüz altmış guruş ücret ile ba‘de’t-tahliye mezbûr Osman Ağa taraf-ı vakıfdan istîcâr etmişdim el-hâletü hâzihî asl-ı mâl-ı vakf-ı merkūm sekiz yüz guruş ile menzil-i mezkûr ücretinden üç senede zimmetinde müctemi‘a olan üç yüz altmış guruş ki cem‘an bin yüz altmış guruşu taraf-ı vakfa edâ ve teslîm edip lâkin mezbûr Osman Ağa tecdîd-i akd-i icâre olmaksızın menzil-i mezkûrda işbu târih-i i‘lâma gelince otuz bir ay dahi sâkin olmağla menzil-i mezkûrun beher beşer guruş ecr-i mislinden otuz bir ayda zimmetinde terâküm eden yüz elli beş guruşu mezbûr Osman Ağa’dan taraf-ı vakf için taleb ederim deyü da‘vâ ol dahi ikrâr u i‘tirâf etmeğin mûcibiyle meblağ-ı merkūm yüz elli beş guruşun taraf-ı vakıf için mütevellî-i mezbûra edâsıyla mezbûr Osman Ağa ilzâm olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 22 min-S sene 1207.