Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 894 Hüküm no: 1519 Orijinal metin no: [127b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketlerinden dolayı daha önce mahalleden çıkarılanların tekrar dönmemeleri için emir çıkarılması Ma‘rûz Medîne-i Üsküdar’da Kādıasker mahallesinin imâm vekîli ve müezzini Hafız Ahmed Efendi b. Osman ve ahâlisinden Hasan Ağa b. Süleyman ve Hafız Hasan b. Salih ve Molla Mustafa b. Ahmed ve Mehmed b. Süleyman ve Ahmed b. Süleyman ve Molla Hüseyin b. Mahmud ve Ömer b. Ali nâm kimesneler medîne-i mezbûrede mahfil-i Bâb’da meclis-i şer‘-i hatîrde Veli b. Osman mahzarında bundan akdem bâ-fermân-ı âlî medîne-i mezbûreden nefy ü iclâ olunup bilâ-ıtlâk mahalle-i mezbûreye gelip mütevattın olan gāibetân ani’l-meclis mezbûr Veli’nin anası Âişe bt. Ahmed ve zevcesi diğer Âişe bt. Abdullah kendi hâllerinde olmayıp herbirleri hadîdetü’l-lisân ve dâimâ bizlere şütûm-ı galîza ile şetm ve hetk-i ırz etmeleriyle harekât-ı nâ-marzıyelerinden bi’l-külliye emn ü rahatımız meslûb olduğuna binâen bundan akdem mahalle-i mezbûreden bi’l-i‘lâm ihrâc olunmuş idi hâlâ mahalle-i mezbûrede menzilleri olmağla mezbûr Veli gāibetân-ı mezbûretân Âişe ve diğer Âişe’yi iskân murâd etmekle yine iskân olundukları sûretde cümlemiz tekdîr ve ta‘cîzden hâlî olmayız deyü ber-minvâl-i meşrûh adem-i emniyet birle sû’-i hâllerini ihbâr ve mezbûrûn Veli ve Âişe ve diğer Âişe’den herbiri mahalle-i mezbûrede iskân etmemek üzere ahâli-i mezbûrûndan herbiri fermân-ı âlîleri sudûrunu istid‘â eyledikleri bi’l-iltimâs huzûr-ı âlîlerine i‘lâm olundu. Fî 18 min-S sene 1207.