Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 895 Hüküm no: 1520 Orijinal metin no: [127b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muratlı köyündeki tımar sahiplerinin, topraklarındaki korudan ağaç kesip başkalarına satan Ahmed Ağa ve Hacı Mustafa ile sulh oldukları Ma‘rûz Medîne-i Üsküdar’a muzâfe Yoros nâhiyesine tâbi‘ Muradlı karyesi ahâlisinden Osman b. Halil ve İbrahim b. İsmail ve Ömer b. Süleyman ve Süleyman b. Mehmed asâleten ve sâhib-i arzuhâl Mehmed Emin b. Süleyman ve Ömer b. İbrahim nâm kimesneler taraflarından vekîlleri olduğu Hüseyin Ağa b. Abdullah ve Nuh b. İbrahim nâm kimesneler şehâdetleriyle sâbit olan Musa Odabaşı b. Abdullah nâm kimesne vekâleten meclis-i şer‘-i hatîrde arzuhâlde isimleri mezkûr Ahmed Ağa b. Abdullah ve el-Hâc Mustafa b. Abdullah nâm kimesneler mahzarlarında ber-vech-i iştirâk mutasarrıf olduğu kılıç tımarı toprağında vâki‘ Kışlak ta‘bîr olunur koruda nâbit olan eşcârı mezbûrân Ahmed Ağa ve el-Hâc Mustafa Ağa altı yüz guruşa âhara bey‘le istihlâk etmekle nısfı olan meblağ-ı merkūm üç yüz guruşu bi’l-asâle ve bi’l-vekâle taleb ederiz deyü eyledikleri da‘vâlarından bâ-tavassut-ı muslihîn yüz kırk guruş bedel-i makbûza mezbûrân el-Hâc Mustafa ve Ahmed Ağa ile sulh olup ziyâde müdde‘âlarına müte‘allika âmme-i de‘âvîden mezbûrân Ahmed Ağa ve el-Hâc Mustafa Ağa’dan herbirinin zimmetlerini ba‘de’l-ibrâ ve’l-kabûl kat‘-ı münâza‘a eyledikleri mübâşiri kapı kethudâsı kulları iltimâsıyla huzûr-ı âlîlerine i‘lâm olundu. Fî 3 min-Ra sene 1207.