Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 223 Hüküm no: 161 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazinedârbaşı Bali Ağa’nın evlatlarının Fındıklı’daki vakıf ve mezraanın kullanım hakkını kendi rızaları ile Haremeyn evkafı mütevellisine devrettikleri Mahmiye-i Kostantıniyye mahallâtından merhûm Cezerî Kasımpaşa mahallesinde sâkin iken bundan akdem vefât eden merhûm ve mağfûrun-leh Hazînedâr Bâli Ağa b. Abdülmennan nâm vâkıfın evlâdından olup ber-mûceb-i şart-ı vâkıf müşârun-ileyh süknâsı ale’s-seviyye kendilere meşrût olan menzil-i âti’l-beyâna vâzı‘ü’l-yed ettikleri nehc-i mu‘teber üzere sâbit olan Abdürrahim Çelebi b. Abdülhay ve Kerime Hatun bt. Sinan Ağa ve mezbûre Kerime’nin sadriye kızı Fâtıma Hatun bt. Hüseyin Çavuş meclis-i şer‘-i hatîr-i lâzımü’t-tevkīrde mahmiye-i merkūmede Haremeyn-i Şerîfeyn Evkāfı’na bi’l-fi‘il mütevellî olan işbu sâhibü’l-kitâb fahrü’l-akrân Hasan Bey b. Mehmed nâm bevvâb-ı sultânî mahzarında her biri asâleten ikrâr-ı tâm ve takrîr-i kelâm edip mahmiye-i Galata müzâfâtından kasaba-i Tophane fevkinde Fındıklı nâm mevzi‘de Selimhatun mahallesinde her sene Sultân Bayezid Hân aleyhi’r-râhme ve’l-gufrân hazretleri Evkāfı’na mukāta‘ası olan bennâ zirâ‘ıyla tûlen yüz elli ve arzen altmış iki bi-hesâb-ı şatrancî sekiz bin altı yüz altmış zirâ‘ arsa üzerine mebnî iki muhavvatayı muhtevî olup muhavvata-i <> dâhiliyyesi iki bâb fevkānî odayı ve altında bir ahırı kebîri ve mülâsık bir küçük odayı ve üç sofayı ve bir köhne hamâmı ve bir matbahı ve câmekâna mülâsık bir küçük tahta odayı üç bi’r-i mâyı ve kenîfi ve cüneyneyi hâvî olup muhavvata-i hâriciyyesi beş bâb fevkānî üç bâb tahtânî odayı ve iki sofa ve iki dahlîzi ve kenîfi ve bi’r-i mâyı ve cüneyneyi müştemil olup hudûdunun bir tarafı Karaçelebizâde Mehmed Efendi bahçesine ve bir tarafı bazen Ayas Paşa bahçesine ve bazen Haremeyn-i Şerîfeyn Vakfı’na ve bir tarafı Kapıcı Mehmed Bey mülküne ve bir tarafı bazen tarîk-i âm ve bazen tarîk-i hâssa müntehî olan menzilini ve hesâb-ı mezbûr üzere kırk beş bin zirâ‘ mezra‘asını vâkıf-ı müşârun-ileyh hazretleri hâl-i hayâtında mülkü iken evvelâ kendi nefsine ba‘de vefâtihî evlâdına ve evlâd-ı evlâd-ı evlâdına ve ba‘de’l-inkırâzihim Medîne-i Münevvere fukarâsına vakfedip etmişidi lâkin biz evlâd-ı vâkıfdan olmağla ber-mûceb-i şart-ı vâkıf-ı müşârun-ileyh vaz‘-ı yed edip ale’s-seviyye mutasarrıflar iken mürûr-ı eyyâmla menzil-i mezbûr harâba müşrif olup ta‘mîrine kudretimiz olmamak ile bi’l-külliye münhedim olup intifâ‘dan kalması muhakkak olmağın hâlâ her birimiz rızâmız ile taleben li’l-ecr ve’s-sevâb mine’l-meliki’l-vehhâb menzil-i merkūmdan hakk-ı süknâmızı Medîne-i Münevvere-i mezbûre fukarâsına fâriğ olup mütevellî-i merkūm Hasan Bey’e teslîm ettik ol dahi tevliyeti hasebi ile <> vakf-ı mezbûr için kabz ve tesellüm eyledi min-ba‘d bizim alâka ve medhalimiz <> kalmadı dedikde gıbbe’t-tasdîki’ş-şer‘î mâ-vaka‘a ketb olundu. Fî-evâili Şa‘bâni’l-mu‘azzam min-şühûri li-sene erba‘a ve ışrîn ve elf. Şühûdü’l-hâl: Hüseyin b. Timurşah, Yusuf b. Abdullah el-hammâmî, Ahmed b. Mustafa el-hammâmî, Hasan b. Abdülmennan, Ali Çelebi b. ( ) el-mi‘mâr, Hüseyin Çelebi b. Ömer ve gayruhüm.