Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 63 Hüküm no: 68 Orijinal metin no: [24-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eşe mehir olarak verilen eşya ile câriyenin kocanın muhallefatına katılmadığı Oldur ki Mahrûse-i Galata’da el-Hâc A‘mâ mahallesinde fevt olan Maksud Bey b. İbrahim nâm [kimesnenin] zevcesi Güllâle bt. Abdullah kıbelinden vekâleti sâbit olan Pîrî b. Abdurrahman mahfil-i şer‘[a] müteveffâ-yı mezbûrun Mustafa nâm sagīrine kıbel-i şer‘den vasî olan Mehmed Çelebi b. el-Hâc Mehmed nâm kimesneyi ihzâr edip üzerine takrîr-i merâm edip müteveffâ-yı merkūm Maksud müvekkilem mezbûreyi nikâh ettikde mehr-i mu‘accel on aded sahan üç tencere bir sini bir leğen-i libâs ve bir leğen-i hamam bir halı bir kilim üç döşek beş yastık ma‘a üç yorgan ve bir Rûsiyyetü’l-asl câriye verip akd-i nikâh olmuşdur hâliyâ bu zikr olan esbâbı merhûmun muhallefâtına idhâl edip mezbûrenin tasarrufuna mâni‘ olur dedikde ba‘de’s-suâl mezbûr Mehmed bi’l-inkâr cevâb vericek vekîl-i mezbûrun da‘vâsına muvâfık beyyine taleb olundukda Ahmed Halîfe b. Abdullah ve Ali b. Mahmud nâm kimesneler şehâdet edip bu zikr olan esbâbı merhûm Maksud mezbûre Güllâle’ye nikâh ettikde mu‘accel deyû verip bunun üzerine akd olun[du] şâhidleriz şehâdet dahi ederiz dediklerinde şehâdetleri hayyiz-i kabûlde vâki‘ oldukdan sonra mâ hüve’l-vâki‘ sicil olundu Tahrîren fî evâili Recebi’l-mürecceb sene 985. Şuhûdü’l-hâl: Ahmed Çelebi b. Abdullah, Ali b. Mehmed el-İmâm, Mehmed b. Mehmed, Ali b. İbrahim, Mehmed b. Bâli ve gayruhüm